venres, 27 de decembro de 2013

Despedida de ano

Fin de 2013

O BNG de Fene convida a todo o conxunto da militancia e simpatizantes a despedir o 2013 o vindeiro luns 30 a partir das 20.30 horas.
                 
O BNG de Fene propón unha actividade festiva para despedir o ano no noso local (Avda. Naturais 41-43 traseira) este luns 30 ás 20.30 horas.
Trátase de xuntarnos para agradecer o traballo e o apoio recibido, brindar e tomar algo xuntos/as.


Gostaríamos de contar coa túa/vosa presenza! Unha aperta.


venres, 20 de decembro de 2013

O BNG DE FENE PESENTA UNHA MOCIÓN PARA QUE SE GARANTA O SUBMISTRO ELÉCTRICO ÁS PERSOAS SEN RECURSOS

O GM do BNG de Fene presenta, ante a indiferencia do PP, unha moción para que se tomen mendidas lexislativas que impidan o corte do subminstro eléctrico ás persoas con menos recursos. Concretamente propóñense ao Pleno os seguintes acordos:
 
1) Realizar as modificacións lexislativas necesarias para garantir o subministro enerxético ás familias que estean en situación de pobreza e, entre tanto, adopte medidas prácticas para evitar as dramáticas consecuencias desta problemática nos fogares galegos máis desfavorecidos.
 
2) Demandar do Goberno do Estado español que non incremente o recibo da luz para o 2014.
 
3) Solicitar do Goberno do Estado español que permita a creación dunha tarifa eléctrica galega que, atendendo á condición de Galiza como excedentaria na produción de electricidade, posibilite unhas menores tarifas tanto para o consumo doméstico como para as empresas.

As razóns da presentación desta moción son os milleiros de persoas que en Galiza e no Estado viven na pobreza e padecen a pobreza enerxética. No conxunto do Estado Español hai 2,2 millóns de nenos e nenas que viven por baixo do limiar da pobreza.

O goberno local debe garantir por medio da administración municipal e dos servizos sociais públicos o apoio as persoas que o precisaren e tamén debe impulsar diante do Estado español e da Xunta de Galiza iniciativas para que a prestación de servizos básicos destinados aos grupos máis desfavorecidos e medidas específicas dirixidas a persoas en risco de exclusión social e con necesidades especiais permitan contribuír a garantir o benestar, a saúde e calidade de vida nesta situación dramática que padecen.

O goberno do Estado español xustifica o fortísimo incremento do recibo da luz dos últimos anos nun suposto déficit tarifario. Cómpre avogar, pois, por uha reforma a fondo da normativa do sector eléctrico, tanto para corrixir os denominados inxustos e elevados beneficios que se xeran co formato actual de poxas de enerxía no mercado maiorista, co que se poría fin á escalada no incremento do déficit da tarifa, como para retornar a un modelo de maior intervención e control nun servizo esencial como o subministro eléctrico aos fogares, cuxa liberalización demostrou que beneficia exclusivamente ás grandes empresas enerxéticas a custo dunha política abusiva coa maioría das persoas abonadas. 
 
 
 
 
 


 

sábado, 14 de decembro de 2013

Acto comarcal sobre a situación do sector naval, este martes.

 

 
Neste acto, no que contaremos coas intervencións do portavoz nacional do BNG, Xavier Vence, a portavoz comarcal do Bloque en Ferrolterra, Mercedes Tobío e Iván Rivas, portavoz municipal do BNG no Concello de Ferrol, presentarase un documento coas propostas do Bloque Nacionalista Galego ao respecto do sector naval e a aposta polo seu futuro, cotra a permanente reestruturación promovida polos partidos que gobernan e gobernaron o Estado Español, PP e PSOE.
 
 
 
 
 
 

xoves, 28 de novembro de 2013

Acto sobre o Día Internacional da Non Violencia Contra a Muller

Como cada ano o BNG de Fene organiza un acto na semana do Día Internacional da Non Violencia Contra a Muller (25N).
 
Será este venres 29 ás 20 horas no noso local, o acto é aberto a todo o mundo e consistirá na proxección de varias curtametraxes e unha pequena charla-coloquio posterior coordinada pola compañeira María Sánchez. Ao remate estades tod@s convidad@s a unha degustación de cogumelos preparados, coma sempre, pola nosa compañeira Pepa.
 
Asiste e convida a quen queiras!


 
 
 

luns, 25 de novembro de 2013

O BNG FAI RECUAR AO GOBERNO LOCAL DE FENE E ASUME O PAGO DAS SUBVENCIÓNS NOMINATIVAS ÁS ASOCIACIÓNS PARA AS ACTIVIDADES DO ANO 2013

Na Comisión informativa de Promoción económica e facenda  celebrada hoxe o seu Presidente, o popular Juan José Franco, respondeu ao BNG que si lles ían pagar ás entidades  asociativas de Fene os máis de 23.000 € aos que se comprometerá para este ano.

A pregunta do BNG veu motivada  pola resposta que tiña dada o edil popular  no Pleno do pasado día 7 deste mes no que dixo que “ao non terse aprobados os orzamentos de 2013 non se podían pagar as subvencións nominativas”. Os nacionalistas de Fene expresamos o noso desacordo co impago das axudas polo que manifestamos a nosa oposición a toda modificación de creto se previamente non se solucionaba o pago das axudas ás entidades asociativas do concello polas actividades deste ano.

A pesar da advertencia do BNG, os populares preferiron manter un Pleno extraordinario cunha nova modificación de creto que non incluía a solución ao pagamento das subvencións. Desta teimuda posición do PP derivou o voto en contra dos nacionalistas a esta nova modificación de creto e a evidencia de que non se trataba dun farol. Dúas semanas despois rectifican e asumen que lle van dar unha solución ao pago das subvencións grazas á posición de firmeza do BNG.
 

 

mércores, 20 de novembro de 2013

O PLENO TUMBA A PREPOTENCIA DO ALCALDE DE FENE

O luns pasado o Pleno do Concello foi convocado de xeito extraordinario e urxente polo Alcalde popular Gumersindo Galego. O asunto a tratar viña a ser unha modificación de creto  para cubrir a parte municipal dunha subvención para a instalación dun parque infantil en Fene. A oposición no seu conxunto  negouse a tramitar o expediente. O Alcalde foi incapaz de ter o  apoio da maioría do Pleno a pesar da sinxeleza para atopar o acordo.

A situación do concello de Fene que conta co orzamento prorrogado de 2012 obriga en determinadas circunstancias a facer modificacións de creto  para poder executar diferentes proxectos. Un asunto que podía parecer un trámite sinxelo ven precedido da advertencia do BNG de que ou se pagaban, por parte do goberno local, as subvencións nominativas ou o BNG ía votar non a calquera outra modificación de cretos.

 As subvencións nominativas son aquelas que figuran nas Bases de execución do orzamento con nome e apelidos, como por exemplo o comedor do CEIP de Centieiras, a subvención ao funcionamento de ASPANEPS, ou actividades culturais como O Festipote, Fenerock , Xuntanza de Gaiteiros, Romaría do Camiñante descoñecido ou Felipop entre outras.

Para os nacionalistas de Fene garantir as actividades do movemento asociativo está por riba dos intereses do PP. No pleno ordinario de novembro os populares afirmaron nunha resposta ao BNG que sen orzamentos non habería subvencións nominativas.  Desde ese día  van xa dous  Plenos extraordinarios onde o BNG condicionou o seu apoio a calquera modificación de creto á modificación das  Bases de execución de 2012 e o pagamento posterior das subvencións nominativas ás entidades veciñais.
 
 

Acto en Perlío, este venres ás 20 h.


xoves, 31 de outubro de 2013

O ALCALDE DE FENE DESESTIMA O RECURSO PRESENTADO POLO BNG Á CONTRATACIÓN DE PERSOAS NO DESEMPREGO

O portavoz nacionalista presentou un recurso, o 24 de outubro, ás bases polas que o Alcalde de Fene convocou o procedemento público para proceder á selección de persoal laboral de carácter temporal ao abeiro dos Programas de Cooperación da Xunta de Galicia coas entidades locais 2013, para tres postos de peón a media xornada e unha de auxiliar de axuda no fogar a xornada completa.
Curiosamente na resposta ao recurso se desestima o mesmo e se informa ao BNG da modificación das Bases nos apartados de experiecia profesional e nos méritos. No primeiro caso se reduce a valoración da experiencia e no segundo se incrementa o valor dos méritos a acreditar.
 

O "remendo" feito pola alcaldía non resolve a situación de desproporción entre o que se pide e as carácterísticas dos postos a contratar. As bases manteñen 20 temas dos cales 10 son de dereito administrativo e obvianse probas prácticas. Con este tipo de selección non se garante a inclusión social das persoas con máis dificultades.
 

Para o portavoz do BNG no concello, Manuel Polo, trátase dunhas bases burocráticas e totalmente insensibles á gran problematica do desemprego en colectivos con difícil inserción laboral, persoas con cargas familiares ou desempregadas de longa duración.
 
 
 
 
 
 

sábado, 26 de outubro de 2013

O ALCALDE DE FENE REXEITA A OFERTA DO BNG PARA NEGOCIACIAR O ORZAMENTO DE 2014

    O portavoz nacionalista ofreceu ao Alcalde de Fene, logo dun longo debate, a posibilidade de retirar o orzamento de 2013 e sentarse a negociar o 2014, que é o que tocaría a estas alturas do ano. Esta oferta foi o derradeiro intento dos nacionalistas en levar ao Concello de Fene polo camiño de ter unhas contas útiles e non o de  continuar coas contas prorrogadas desde 2012.
    
    O BNG lembroulle ao Alcalde que tiña dúas posibilidades para aprobar o orzamento, unha, actuar en contra do parecer da maioría e sacalo adiante vinculándoo a unha cuestión de confianza, ou unha segunda opción e que foi a oferta do BNG que retirase o documento de 2013 e que se implicase na negociación do 2014.
    
    Falla de vontade e vitimismo, estas foron as características do discurso do alcalde.  O Goberno de Fene é vítima, como o propio Alcalde recoñeceu,  das políticas do PP no goberno do Estado e da Xunta que recortan ingresos e limitan a capacidade de gasto beneficiando so aos bancos. A falla de vontade foi total por parte do Alcalde Gumersindo Galego que nin se sentou a falar do orzamento.


    O Alcalde ten que mirar se antepón o seu interese de ser Alcalde cos intereses dos veciños de Fene que é ter un orzamento útil na prestación de servizos e na creación de emprego.


luns, 9 de setembro de 2013

Homenaxe a Pancho Allegue o pasado 1 de setembro: Intervención de Juventino Trigo

Bo día a todos e a todas.

Pouco ou nada me queda por dicir sobre a persoa que hoxe homenaxeamos. A súa calidade humana e a súa calidade como político evidénciase no feito de que, oito anos despois, aquí estamos todos e todas lembrando a súa figura. Nuns tempos nos que referirse a alguén como político interprétase case coma un insulto, o recordo de Pancho Allegue debe servirnos para lembrar o que significa en realidade ser político ou ter unha faceta política na vida.
 
 
 

A faceta política é aquela que nos define como persoas que traballamos para o pobo, mirando polo ben do pobo desde a perspectiva do que nós pensamos que é o mellor. Iso é o que facía Pancho, e iso é o que o BNG sempre fixo en Fene e en Galiza.

Quenes levaron á sociedade a pensar que ser político é sinónimo de ser corrupto, ladrón ou aproveitado, dende logo, non foron persoas coma Pancho. Por iso, dende o BNG de Fene, e a cidadanía de Fene en xeral, debemos berrar ben alto en contra desa máxima que nos queren instalar no cerebro a través dos grandes poderes establecidos (gobernos, poder económico, poder mediático): Non todos somos iguais, non todos os políticos son iguais, e non todos os partidos son iguais.
 

Estamos vivindo unha das etapas máis difíciles da nosa historia recente, tanto no país como, en concreto, e sobre todo, na nosa comarca. O paro alcanza cifras astronómicas, a nosa xuventude emigra, os nosos dereitos vense recurtados día a día, tanto no eido laboral coma no eido dos dereitos sociais, sanidade, educación,... E o peor é que a solución non chega, non se ve aínda a luz ao final do túnel. A ASTANO non nos traen barcos, seguen sen depurarnos a ría, o comercio esmorece, cada día pechan máis negocios, e ¿ata cando esta situación? Ata que outros queiran, ata que queira a Unión Europea, ata que queira o goberno de España, ata que queira a banca.
E así levamos anos e anos, agardando a que outros tomen unhas decisións que non chegan porque non somos nós mesmos quenes as tomamos.
 

Digna Faraldo, Ana Santiago,
Suso Cea e Juventino Trigo
Pancho loitaba por acadar melloras laborais para os traballadores e traballadoras do naval. Agora temos que loitar por acadar que non se afunda o estaleiro. El loitaba en Fene por acadar cada vez máis benestar para os veciños e veciñas. Agora temos que loitar para evitar quedarnos sen poboación, por axudar a reducir o desemprego, por mirar de pagar as facturas sen problemas. E está claro que o goberno da dereita non está polo labor. Eles siguen ao seu, gobernando para os amigos poderosos, espoliando os nosos recursos e eliminando os servizos sociais, tanto en Fene, coma en todos os estamentos nos que gobernan.

 
 
 
Por iso, políticos coma Pancho son hoxe máis necesarios ca nunca, e por iso, os seus compañeiros e compañeiras de partido debemos mirarnos no seu espello máis ca nunca. Debemos traballar polo noso, polos nosos recursos, que son moitos e moi bos, pola nosa xente, polo noso pobo, que, como cantaba Zeca Afonso “é o que máis ordena”.
Entre todos e todas, e coa lembranza de Pancho, de seguro que o conseguiremos.

Moitas grazas.
 
 

luns, 26 de agosto de 2013

Homenaxe a Pancho Allegue

O BNG de Fene organiza, como cada ano, un acto de homenaxe a Pancho Allegue

 
No oitavo aniversario do seu falecemento, non esquecemos o seu traballo e compromiso co pobo, que deixou unha pegada presente aínda en todos os recunchos do municipio. Por iso, comprácenos convidarvos a esta lembranza que terá lugar, como é habitual, ao pé do monumento dedicado á súa memoria no Parque de Castelao, o vindeiro domingo, 1 de setembro, ás 12 mañá.
 
 


 
 
 
 

 

xoves, 11 de xullo de 2013

Festa Comarcal do BNG en Fene

Xantar do país, música en directo e moi boa compañía o 20 de xullo en San Valentín!!

Para celebrarmos o Día da Patria, desde o BNG comarcal organizan unha xornada festiva o vindeiro sábado 20 de xullo no paseo de San Valentín (Fene). Comeremos baixo carpa a base de mexillóns, churrasco, bebidas e sobremesa, por só 15 € por persoa. Teremos xogos para que os nenos e nenas poidan estar entretidos e divertíndose en todo momento. Acompañaranos o portavoz nacional do BNG, Xabier Vence, a partir das 19 horas. E despois, poderemos escoitar en directo a grupos de primeiro nivel da música galega como os “UlträQäns” e a “Familia Caamagno”, acompañados dos locais “Tremebundos” de Moeche e “Estimaba que Viñeras” de Fene.

Estades todas e todos convidados e podedes, por suposto, convidar a quen queirades. Sortearemos tamén unha estancia nunha casa rural galega e pasaremos una moi boa tarde-noite sen lugar a dúbidas.

O prazo para apuntarse (ao xantar) remata o 17 de xullo, e podedes facelo por calquera vía (por teléfono 981 364058, correo electrónico ferrol@bng-galiza.org ou bngfene@gmail.com, facebook comarcal ou da Asemblea do BNG de Fene, avisando á persoa responsábel local do BNG, etc.).


Non o podedes perder!!



venres, 5 de xullo de 2013

O BNG CALIFICA DE HIPÓCRITA A ACTITUDE DO PP DE FENE NO PLENO ANTE O INMINENTE PECHE DE MEGASA

O Pleno ordinario de Fene celebrado onte foi o centro da protesta dos traballadores e traballadoras da Naronesa Megasa. No punto 5 da orde do día ía a moción, que por unanimidade asinamos todos os grupos, de apoio á demanda de modificación do decreto que regula a tarifa eléctrica para a siderúrxica.
 
 
Na intervención no Pleno  o Portavoz nacionalista, Manuel Polo, afirmou ”o PP de Fene está realizando un exercicio de cinismo tremendo xa que aquí apoian aos traballadores de Megasa, a folga comarcal pasada, ou as demandas do naval, e logo o seu partido esmaga calquera aspiración para resolver estes problemas. Teñen dúas opcións manterse na hipocresía ou abandonar o PP”.
 
 
 
 
Os nacionalistas de Fene estamos cheos de apoios de cara a galería, porque os mesmos inútiles que nos están deixando sen opción laboral son para os que Gumersindo Galego pedirá o voto cando toque.
 
Neste mesmo sentido o BNG presentamos unha MOCIÓN DE RESPOSTA Á GRAVE SITUACIÓN DE CRISE NA COMARCA na que logo do gran paro comarcal do pasado 12 de xuño se pedía a adopción dos seguintes acordos:
 
1.- Reprobar a actitude do Goberno do Estado e da Xunta de Galiza, pola posición insensíbel e enganosa perante os compromisos asumidos coa comarca e pola falta de medidas concretas na defensa do emprego e dos nosos sectores produtivos.
 
2.- Articular, dun xeito urxente e en conxunto cos diversos sectores da sociedade comarcal, medidas de presión que obriguen aos devanditos gobernos ao cumprimento das demandas que se veñen facendo nos últimos anos; e que constituíron o clamoroso e unánime berro da sociedade comarcal o pasado dia 12 de Xuño.

A moción saíu adiante coa abstención do PP que actuou esta vez  na liña de defensa do seus superiores sendo incapaces de apoiar a moción, amosando de novo a súa dobre faciana. 
 
 
Foto: Diario de Ferrol
 

sábado, 22 de xuño de 2013

O PP DE FENE EMPANTANA O PLAN DE EMPREGO E A BAIXADA DE IMPOSTOS PARA OS ORZAMENTOS 2013

Pasaron 6 meses desde que o BNG entregase aos grupos municipais a proposta de crear un Plan de reactivación económica e do emprego.  Os nacionalistas obrigamos ao PP a crear unha Comisión especial para elaborar o Plan. Ademais o orzamento do  ano 2013  debería estar condicionado por estas medidas, tanto no aspecto de creación de emprego, cos proxectos a desenvolver, como na mellora da política fiscal potenciando as exencións para as rendas máis baixas e favorecendo reducións e bonificacións  ao comercio e hostalaría.

Os pasos que deron os populares nestes meses foron en dirección contraria, na elaboración de ordenanzas fiscais, nas contratacións de persoal  e na contratación de empresas foron  xusto na dirección contraria ao proposto polo BNG no Plan de reactivación económica e do emprego.

 Na contratación de empresas excluíuse a todas as empresas da comarca na adxudicación máis importante feita no que vai de ano. A exclusión produciuse pola esixencia dunha clasificación en materia de mantemento que so teñen grandes empresas e que era innecesaria para a limpeza e mantemento das instalacións deportivas municipais.

 Na contratación de persoal, crearon unhas bolsas de substitucións dando tan so 5 días naturais para anotarse con total nocturnidade e sen dar conta aos grupos políticos ata que xa estaba o proceso iniciado.

 Por último nas ordenanzas fiscais, o PP propuxo e logo retirou da orde do día do último Pleno, unha ordenanza de terrazas nas que dicía que reducía a taxa pero aplicaban o prezo máximo que indicaba o informe técnico. Para o BNG é o momento de colaborar coa hostalería rebaixando ao máximo a taxa de terrazas.

 
Logo de 3 meses de traballos o alcalde foi incapaz de traer unha proposta de Plan de  reactivación económica e polo emprego.

 
 
 

martes, 11 de xuño de 2013

UNANIMIDADE NO APOIO Á FOLGA COMARCAL POR PARTE DO PLENO DO CONCELLO DE FENE

Os nacionalistas convidamos a toda a Corporación a realizar unha declaración institucional de apoio á folga xeral do vindeiro 12 de xuño. A resposta do conxunto da corporación foi o apoio unánime do seguite texto aprobado no Pleno ordinario do xoves pasado:

Declaración institucional sobre a folga xeral comarcal do 12 de Xuño

A corporación municipal do concello de Fene, perante a convocatoria de folga xeral na comarca para o vindeiro 12 de Xuño, manifestamos:

- Que a situación da nosa comarca atópase nunha fase crítica, por mor das políticas de destrucción dos nosos sectores produtivos, que levaron a un progresivo aumento do índice de desemprego – neste momento, o 32%, 10 puntos por riba da media galega – o progresivo aumento da emigración da nosa mocidade e, en definitiva, á depauperación económica e social no ámbito comarcal.

- Que perante esta situación, os diversos gobernos – tanto o do estado como a Xunta – non están a prantexar iniciativas políticas na defensa dos nosos sectores produtivos; mesmo incumprindo claramente os compromisos que se tiñan feito no seu momento a respecto dalgún deles, como o naval, o eólico, etc……

- Que, como representantes da cidadanía afectada por esta situación, entendemos que non só non debemos de permanecer ao marxe; senón que mesmo cúmpre que adoptemos unha posición activa na denuncia desta situación e na exixencia de medidas concretas aos gobernos para trocar esta situación.

Neste sentido, os grupos municipais do PP, PSOE, BNG e IU manifestamos:

1.- O noso apoio á convocatoria de Folga Xeral para o dia 12 de Xuño, así como o compromiso de favorecer desde a institución municipal o chamamento á participación da mesma ao conxunto da cidadanía do noso concello.

2.- A exixencia aos gobernos do estado e a Xunta para a concreción de medidas e prazos concretos para abordar iniciativas na defensa do emprego e dos nosos sectores produtivos.

3.- O chamamento aos diversos sectores sociais, políticos, empresariais, sindicais, entidades e insituciónais da comarca para a conformación dun foro/ente que, ao fío da mobilización, se articule como instrumento de presión/negociación das demandas comarcais.

(O Pleno do concello está composto por 17 persoas, 6 do PP, 5 do Psoe; 5 do BNG e 1 de IU)

 


venres, 10 de maio de 2013

Constitúese a Comisión de investigación do contrato de limpeza, mantemento e conserxería das instalacións deportivas de Fene

Este mércores deron comezo os traballos da Comisión de investigación que trata de aclarar e aportar información aos grupos municipais do desfase entre o servizo contratado e o realmente facturado.
 
Foi no pasado Pleno do 2 de maio onde se aprobou por unanimidade a creación desta Comisión de investigación. Para o BNG, que foi quen fixo a proposta, é necesario por branco sobre negro neste asunto. Existen irregularidades como é que se facturou dúas veces  polo mesmo traballo, “isto ou ten unha explicación ou hai alguén que terá que ter responsabilidade” afirmou o portavoz Manuel Polo.
 
Xa no mes de marzo tivera que comparecer a concelleira Rocío Bértoa a petición dos nacionalistas, naquela comparecencia quedaron cuestións sen aclarar, e máis ben serviu para confundir máis a quen non tivese toda a información.
 
Na Comisión constituída este mércores os nacionalistas solicitaron unha aclaración polo miúdo de todas as facturas da empresa Eulen emitidas nos meses que leva desenvolvendo o contrato e ao tempo que o goberno explique as grandes diferenzas económicas existentes entre o contrato elaborado en 2012 e o que se está a licitar na actualidade. Son uns 60.000 de diferenza que non tiveron unha explicación  soportada documentalmente cun informe técnico.
 
 

venres, 3 de maio de 2013

TRES INICIATIVAS DO BNG ENCHEN DE CONTIDO O PLENO DE FENE DO MES DE MAIO

As iniciativas nacionalistas son as que ocuparon a parte principal do Pleno ordinario de maio onde o goberno so levou unha proposta. O BNG presentou, no pleno ordinario de onte, dúas mocións; unha na que se rexeitan as políticas do Goberno central contrarias aos intereses de milleiros de familias afectadas pola fraude das participacións preferentes e subordinadas que vén como o PP legaliza o roubo dos seus aforros a través da imposición dunha quita e da imposición dun troco obrigatorio por accións de nula solvencia.  Ademais  a moción declara persoas non gratas no noso concello aos 15 deputados e deputadas do PP de Galiza polas graves consecuencias que o seu apoio incondicional á aprobación de normas que legalizan as quitas ás persoas titulares de participacións preferentes e débeda subordinada. Esta moción foi aprobada coa abstención do PP.
 
Por outro lado aprobouse por unanimidade unha segunda moción na que  se solicita a creación dunha comisión de investigación conformada por todos os Grupos Municipais para aclarar, e se é o caso depurar, as responsabilidades existentes derivadas do contrato de mantemento, limpeza e conserxería das instalacións deportivas. Trátase dun tema que sigue sen estar claro e no que desde o BNG esiximos transparencia.
 


Por último os nacionalistas presentamos unha proposta de regulamento de acollementos civís. Este regulamento foi demandado por pais e nais que tiñan a vontade de celebrar a inscrición no concello do seu  fillo ou filla. Trátase de darlle formalidade e protocolo a un acto civil  que no fondo  é unha benvida á comunidade á que ven a formar parte unha nova persoa normalmente un bebe.  Esta proposta tamén foi aprobada por unanimidade.


 
 
 


xoves, 2 de maio de 2013

O GOBERNO DO PP EXCLÚE ÁS EMPRESAS LOCAIS DUNHA ADXUDICACIÓN DE 577.O25,48 €

O Grupo Municipal do BNG  rexeitou participar na Mesa de Contratación que ten que adxudicar os servizos de limpeza, mantemento e conserxería das instalación deportivas do Concello de Fene por un importe de 577.025,48 máis IVE para tres anos. A razón fundamental desta  postura dos nacionalistas ven determinada pola aprobación pola Xunta de Goberno Local dunhas condicións para presentarse ao que non poden acceder as empresas de Fene nin da Comarca de Ferrol. O prego de prescricións administrativas esixe clasificacións en mantemento e limpeza do nivel máis alto e que está orientado para favorecer ás grandes empresas multiservizos e que impiden na práctica o acceso das empresas locais. En toda a provincia da Coruña tan só hai 3 empresas que contan coas dúas clasificacións esixidas.
 
“En pleno debate do Plan de reactivación económica e polo emprego non é de recibo que o goberno de Fene impida o acceso aos concursos ás empresas locais favorecendo ás multinacionais” afirmou o concelleiro nacionalista Juventino Trigo.
 
As ofertas presentadas hoxe no Concello veñen a confirmar este extremo criticado polo BNG,  xa que as empresas son dúas de Madrid, unha de Valladolid, unha de Segovia e a última de Bilbao.




 
 
 
 
 

venres, 26 de abril de 2013

ROSANA PÉREZ PREGUNTA A MONTORO SE 'SE EMPEZARON A CORTAR AS “CHAPAS” NOS ESTALEIROS DE NAVANTIA NA RÍA DE FERROL' COMO O MINISTRO DIXO EN FEBREIRO



A deputada do BNG pide unha solución urxente para os estaleiros galegos porque o Goberno ten o deber de que non se perdan xa máis postos de traballo

 

A deputada do BNG no Congreso, Rosana Pérez, rexistrou unha pregunta dirixida ao Goberno para preguntarlle que carga de traballo existe para os estaleiros públicos de Navantia na Ría de Ferrol.

A qué “chapas”se refería Montoro?

Rosana Pérez alude ás afirmacións realizadas polo Ministro Cristóbal Montoro no pleno do pasado 13 de febreiro, que en resposta á pregunta formulada por esta deputada sinalou que “en marzo se van empezar a cortar chapas”.

 “Dado que non houbo novos traballos en Navantia, nen no pasado mes de marzo nen agora no mes de abril, ¿A qué se refería o Ministro de Facenda cando nesa sesión afirmou que “en marzo se ían empezar a cortar chapas”? De qué chapas se trata?”, pregunta a deputada do BNG . E quer que o Ministro explique que carga de traballo concreta existe e para canto tempo.

Fixeron a solicitude formal ante a UE sobre o dique flotante?

Outra das cuestións que a parlamentar nacionalista pón enriba da mesa é a relativa ao dique flotante. Lembra que tamén lle preguntamos a “Montoro por esta necesaria infraestructura e a negativa do Goberno a promovela cando daría carga de traballo para case dous anos”.

Máis en febreiro “o Ministro eludiu respostar sobre o dique flotante e tan só dixo que o “Goberno non descartou nada”. Mentras tanto, as mesmas autoridades comunitarias desvelaron que o Executivo español non tiña realizado ningunha solicitude formal para poder construir o dique flotante.

Por iso Rosana Pérez dirixe unha serie de preguntas ao Ministro para sabe se se ten dirixido de maneira formal á UE para demandar a construcción do dique flotante, quer sabe se o Goberno español xa descartou definitivamente a posibilidade desta infraestructura, e nese caso, a que se debería.

Están negociando que se levante o veto sobre Navantia Fene?

Outras das cuestións que a parlamentar do BNG non esquece é o veto que desde hai anos pesa sobre  Navantia Fene para construir buques civís. “Un tema que debería ser unha prioridade na axenda e nas negociacións do Goberno en Bruxelas, e algunha vez o Goberno apuntou que estaba pendente desta cuestións pero nunca soubemos se estos contactos podían derivar en algo máis tanxíbel”.

De aí que pregunte ao Executivo se está a realizar algunha xestión ante a UE para que se levante o veto sobre Navantia Fene, e de ser así, “Existe flexibilidade por parte da UE para que se desbloquee esa situación que tanto limita ao noso estaleiro?”.
 


 
 

luns, 22 de abril de 2013

Reelixido o Consello Local de Fene por unanimidade da asemblea

Digna Faraldo encabeza o órgano e Xosé Antonio García Bello
pasa a ser o vice-responsábel
 
 
 
A única lista presentada para conformar o Consello Local do BNG de Fene foi aprobada por unanimidade da asemblea celebrada o pasado venres 19 de abril. Trátase dunha reelección do mesmo equipo conformado hai un ano e encabezado por Digna Faraldo, que continúa como responsábel local. Cambia a vice-responsabilidade, na que Xesús Cea cede a testemuña a Xosé Antonio García Bello, e entra María Sánchez en sustitución de Alba García, que non renova por motivos de incompatibilidade laboral.
Despois de pouco máis dun ano de traballo, o actual Consello Local presentou ante a Asemblea un completo informe de xestión, que tamén foi aprobado por unanimidade, e decidiu, co respaldo da militancia, continuar a súa andaina nos meses vindeiros, nos que se presentan retos importantes como as eleccións europeas de 2014 e as municipais de 2015.
 
A lista presentada polo Consello Local e aprobada pola Asemblea é a seguinte:
 
  1. Digna Faraldo
  2. Xosé Antonio García
  3. Ledicia Trillo
  4. Manuel Vidal
  5. Sandra Permui
  6. Alberto Maceiras
  7. María Sánchez
  8. Xesús Cea
  9. Manuel Polo
 
Suplentes:
 
  1. Alba García
  2. Maribel Serantes
  3. Juventino Trigo
  4. Rita Couto
  5. Inés Roca
  6. Justo Martínez
 

 

mércores, 17 de abril de 2013

O BNG PIDE UNHA COMISIÓN DE INVESTIGACIÓN PARA ACLARAR A FACTURACIÓN DE EULEN NA ÁREA DE DEPORTES

Os nacionalistas vimos de rexistrar unha moción no concello para aclarar a facturación de Eulen no servizo de limpeza, conserxería e mantemento das instalacións deportivas. Desde o inicio do contrato en xuño de 2012 detectáronse numerosas irregularidades tanto por parte de persoas usuarias, grupos políticos, como da Intervención  municipal.

No pasado mes de febreiro solicitamos desde o BNG a comparecencia da concelleira responsábel da área e ademais presidenta da Mesa de contratación. No Pleno ordinario de marzo  tivo lugar a comparecencia solicitada. Na mesma, non aclarou as diferenzas económicas existentes, as dobres facturacións e o sobrecuste existente dunha cifra próxima aos 30.000 € en seis meses de contrato (xuño-novembro de 2012).

No ano 2013 sigue existindo a dobre facturación do contrato, por unha banda o concello paga  o contratado máis a parte paga o mantemento do campo de fútbol que estaba incluído no Prego de prescrición técnicas e administrativas. Con isto atopámonos cun concurso manipulado e viciado de partida nuns 28.500 €.

A Xunta de Goberno aprobou un novo prego de prescricións técnicas e administrativas que saíu publicado o pasado 23 de marzo. A contía deste novo contrato pasa dos 171.000€ do ano 2012 a 232.733, aproximadamente 60.000 € máis ao ano de diferenza.

Ademais deste incremento económico o Prego esixe dúas clasificacións que beneficia exclusivamente ás grandes empresas e deixa sen opción a todas as empresas da comarca de Ferrolterra.
Por todo isto desde o GM do BNG pedimos a creación dunha comisión de investigación conformada proporcionalmente por todos os Grupos Municipais co obxectivo de aclarar, e se é o caso depurar, as responsabilidades existentes derivadas do contrato de mantemento, limpeza e conserxería das instalacións deportivas. Ademais os nacionalistas pretendemos non demorar os traballos da comisión acordando un calendario no que a data tope de conclusións sexa o mes de xuño de 2013.



 

xoves, 14 de marzo de 2013

O BNG REITERA O APOIO Á DEMANDA DE CARGA DE TRABALLO DO COMITÉ DE NAVANTIA

O GM do BNG de Fene queremos amosar publicamente o noso apoio á mobilización de hoxe xoves e do vindeiro 21 de marzo. Para os nacionalistas de Fene o naval é fundamenta para Fene e a comarca. A demanda de compromisos claros de carga de traballo, a xestión do levantamento do veto ou o desenvolvemento da Lei do sector naval de Galiza son cuestións elementais para relanzar a actividade de construción naval en igualdade con calquera outro estaleiro do mundo.

O BNG como organización nin o seu Grupo Municipal en Fene vai asinar comunicado nin manifesto conxunto co PP sobre este asunto. O alcalde de Fene debe esixir ao seu partido, o PP, o cumprimento dos acordos e das promesas, dique flotante, flotel, centro de reparacións… O cinismo do PP de amosar apoio na comarca para logo ir perdendo  compromiso ao achegarse aos centros de decisión que eles mesmos dirixen é un insulto á intelixencia dos habitantes de Ferrolterra.

O PP ten maioría en Santiago e Madrid, controla a SEPI e a dirección de Navantia.  Que cumpran.

Para o portavoz do BNG no concello de Fene Manuel Polo ”resulta moi preocupante que o PP se mobilice, na comarca, polo naval como si eles non tiveran nada que ver coa solución a este problema político que xera desemprego e desesperanza en Ferrolterra”