25 de xullo, Día da Patria Galega!

Como todos os anos o BNG de Fene asistirá á Manifestación Nacional do BNG o 25 de xullo en Compostela, desde o noso blog queremos convidarvos a todos os militantes, familiares e simpatizantes a acudir con nós a esta celebración, haberá un autobús e xantaremos todos e todas na Polbería Amador unha vez finalizados os actos. Para máis información e anotarse podedes facelo no noso correo bngfene@gmail.com. 

Anunciamos tamén que dispoñemos no noso local de bandeiras e autocolantes para o cristal do coche coa "estreleira".

RESCATA OS TEUS DEREITOS. EN BLOQUE, PODEMOS!

 

O GRUPO MUNICIPAL DO BNG DE FENE ABANDONA O PLENO EN PROTESTA POLA PREPOTENCIA DO ALCALDE

O primeiro xoves de mes é o día no que se celebran os Plenos ordinarios no Concello de Fene. O de onte se prevía un Pleno máis con 13 puntos na orde do día na que se aprobaron as tres mocións presentadas polo BNG. Mocións relativas aos recortes da Xunta en formación e emprego, aprobada por unanimidade, unha segunda moción relativa aos recortes da Xunta na eliminación dos convenios polos que se sosteñen as oficinas liquidadoras de impostos dependentes dos Rexistros da Propiedade, aprobada por maioría coa abstención do PP,  e una terceira relativa á situación do sistema financeiro galego, o rescate á banca, a situación das persoas con participación preferentes así como a necesidade de ter una Banca pública galega que defenda os intereses da maioría dos galegos e galegas, tamén aprobada por maioría coa abstención do PP.

Na orde do día tamén figuraba unha proposta do Goberno popular relativa á regulación da terrazas dos locais de hostalaría. O BNG pediulle ao goberno que a retirase para que fose exposta previamente ao sector directamente e ao movemento veciñal. O alcalde retirou o punto da orde do día pero non sen amosar unha actitude prepotente e arrogante fronte as demandas de diálogo do conxunto da oposición.

No último punto da orde do día, Rogos e Preguntas, os nacionalistas como é habitual preguntamos por temas de actualidade que nos preocupan ou que nos transmite o movemento veciñal. A nosa sorpresa foi total cando a preguntas concretas de como se está a executar a prestación do servizo de limpeza mantemento e conserxería das instalacións deportivas pola nova empresa adxudicataria (EULEN) a resposta é defensiva, ofensiva, arrogante e pon na boca dos membros do GM do BNG palabras que nós nunca emitimos, chegando a afirmar que ” é a primeira vez que se sacan estas cousas a concurso e iso é o que vos molesta”.  A realidade é que a empresa recoñece por escrito que non dispón dos medios técnicos que indica o prego, e máis recoñece que nin miraron o documento, e o alcalde lonxe de esixir o cumprimento do prego aprobado, ataca ao BNG pola súa labor de control e seguimento da xestión municipal.

Debido á imposibilidade de contestar, xa que non hai quenda de resposta neste apartado, o GM do BNG decidiu abandonar o Pleno ante a falta total de responsabilidade do alcalde, a prepotencia  exhibida e as mentiras vertidas no Pleno en contestación ás preguntas da representación  nacionalista.

O BNG DENUNCIA O RECORTE DE MÁIS DE 100.000 DE EUROS DE AXUDA PARA CONTRATACIÓN DE PERSOAS NO PARO

“O BNG LEVA  A  PLENO TRES MOCIÓNS PARA QUE O PP DEA MARCHA ATRÁS NOS NOVOS RECORTES” 

O Grupo Municipal do BNG no Concello de Fene leva ao Pleno ordinario do vindeiro xoves tres mocións relativas aos novos recortes do PP en diferentes eidos.

Por unha banda presentamos una primeira moción sobre o sistema financeiro galego, na que se demanda una Banca Pública, un referendo sobre o rescate á banca e na que se inclúe a solución do problema das persoas afectadas polas participacións preferentes e tamén se demanda una comisión de investigación aos responsábeis das caixas.

Por outra banda presentamos unha segunda moción  para que a Xunta de Galiza revoque o acordo de supresión das oficinas liquidadoras de taxas e impostos vinculadas aos Rexistros da propiedade que van provocar o despedimento de máis de 150 persoas e o alonxamento da xestión tributaria de moitos galegos e galegas. Entre os concellos afectados está Fene xa que a oficina que actualmente presta os servizos de liquidación de impostos está situada en Pontedeume e a partir do 1 de xaneiro a Xunta retiraralle o  servizo.

Por último  presentamos una moción contra os recortes da Xunta de Galiza nos Plans de fomento do emprego e nos Plans de formación. Nesta moción denunciamos o recorte de máis dun 70% das partidas dedicadas á contratación de  persoas no desemprego. Este feito  é dobremente negativo para o noso concello xa que ademais de empregar a unhas 14 persoas o concello beneficiábase dun importante reforzo en materia de servizos, protección civil e atención á dependencia. O BNG propúxolle ao goberno facer un Plan de emprego adicional con cargo ao orzamento municipal. O PP preferiu adiantarlle aos bancos 124.000 € de capital dos cretos bancarios.

Para o alcalde de Fene os bancos están por diante da xente, e as políticas de recortes á xente e de apoio á banca so van traer máis crise e desemprego.

ACAMPADA REIVINDICATIVA EN S. VALENTÍN

EN DEFENSA DO EMPREGO, POLO DEREITO A PRODUCIR

POLO FUTURO DA COMARCA

PARTICIPA !!!

Desde onte á noitiña está instalada unha acampada reivindicativa en S. Valentín, na que participan representantes de diversos colectivos e, especialmente, compañeiras e compañeiros do BNG; entre os que xá estivo onte o voceiro nacional do BNG, Guillerme Vázquez.

Esta acción pretende reforzar o noso traballo de sensibilización cara á xornada do vindeiro Xoves dia 28.

Hoxe celebraránse actividades para as nenas e nenos, entre as 17 e 19 horas, e logo a partir das 8 haberá debates sobre as problemáticas arredor das que xira a iniciativa ( naval, saneamento da ría…..) e algún que outro acto lúdico para rematar a xornada. 

Agardamos polo voso apoio e participación!!!

Os recortes do goberno popular de Fene resenten a limpeza das instalacións deportivas

O goberno local de Fene, dirixido polo popular Gumersindo Galego, adxudicou* por un ano a limpeza, o mantemento e a conserxería das instalacións deportivas do Concello. Estas instalacións son os pavillóns polideportivos de A Xunqueira e O Ramo, a piscina climatizada de Centieiras e o campo de fútbol de Os Pinares. A nova empresa adxudicataria é a multinacional Eulen  que se levou o contrato por 145.000 €+ 26.100 € IVE que supuxeron unha rebaixa de custes moi importante con respecto á anterior contrato. O resultado desta rebaixa, logo de 15 días de inicio do novo contrato, é a falta de limpeza por falta de medios técnicos necesarios como varredoras de fondos de piscina, aspiradores, medidores de cloro, e outro material que figura no Prego de clausas técnicas aprobado polo Concello. A piscina municipal de Centieiras sofre a falla de limpeza do interior do vaso dun xeito preocupante comezando a acumular verdín  no fondo ademais de nos existir medicións regulares do cloro. O pavillón da xunqueira tamén sufre a falla de medios técnicos para limpeza.

Para o BNG aforrar empeorando os servizos non é un aforro senón un deterioro dos servizos públicos e das instalacións municipais. Desde o BNG esixiremos o cumprimento das condicións nas que se adxudicou o contrato obrigando ao goberno local a supervisar a execución correcta do contrato. 

* http://bop.dicoruna.es/bopportal/publicado/2012/05/30/2012_0000006333.html

 

 

RAZÓNS PARA VOTAR EN CONTRA DOS ORZAMENTOS MUNICIPAIS

O PP PRIORIZA O PAGO AOS BANCOS FRONTE Á CREACIÓN DE EMPREGO

“Os populares desoiron as propostas nacionalistas en materia de formación, emprego e benestar social.”

O goberno local de Fene, dirixido polo popular Gumersindo Galego, quedouse so na aprobación do orzamento. O BNG e IU con seis votos en contra fixaron a súa posición como moi crítica coas contas peresentadas polo PP, que so avanzaron grazas á abstención do PSOE, que novamente lle permite sacar adiante o segundo orzamento municipal ao PP.

O orzamento de Fene, igual que o resto dos concellos, está moi afectado polas imposicións e improvisacións do goberno do estado en materia económica. As normas impostas polo PP a nivel estatal dificultan moito facer cousas, pero o PP de Fene, vai máis alá do imposto, por exemplo, pediu obrigado polo estado, un Creto ao ICO a un 6,5% en novembro, para pagar facturas da  época de goberno socialista de plena precampaña de 2011. Pois no orzamento de 2012 o PP inclúe unha amortización adicional de 124.000 que non tiñan por que pagar ata 2013. Con esta partida poderíanse ter creado 4 przas de peón so servizo de recollida do lixo durante un ano.

En canto á estructura do orzamento, estes atópanse desinflados nos ingresos, pasandose de prudentes e aída así incrementanse en 450.000 pola subida do IBI 6%, e incremento das Participacions do estado.

En canto aos  gastos, redúcese o gasto de persoal, amortizanse 5 postos  de tarballo e incrementan o gasto corrente no Cap. II que son empresas e servizos subcontratados. Existe un incremento moi importante do gasto financieiro para o pago de intereses e capital dos prestamos que ten pedido o concello.Os investimentos son de uns 500.000 euros, case todo comprometido de Plans de obras de anos anteriores, que supoñen o orzamento máis baixo para obras dos últimos 15 anos.

O orzamento non foi contrastado co movemento asociativo, consigna subvencions nominativas para actos concretos sen falar coas entidades subvencionadas.
No orzamento, novamente, o PP e o Psoe teñen un acordo tácito, o PP soluciona varios problemas herdados do Psoe, por exemplo, o Concurso de tapas do ano pasado igual ou o proxecto da rede WIFI están sen pagar  e figuran neste orzamento.

Por último desde o BNG queremos manifestar que o Concelleiro de Facenda minte cando di que amplia a partida de dependencia, cando na realidade a Xunta de Galiza ten bloqueadas as altas no servizo atención á dependencia e o únicoi que fan e recoller o que se fixo en 2011 que é o que subvenciona a Xunta neste programa.

A posicion do BNG é  en contra porque apostamos pola creacion de emprego, a formacion, a promoción económica e o reforzo dos servizos sociais, moi lonxe do porxecto popular. 

O PP DE FENE EXCLÚE Á OPOSICIÓN DA MESA XERAL DE NEGOCIACIÓN

“O Grupo municipal do BNG lamenta a actitude do PP, os nacionalistas e  afirman que sen participación na negociación non pode haber acordos. “ 

O Goberno popular de Fene ven de celebrar, o pasado venres,  a primeira Mesa xeral de negociación entre a representación laboral e o goberno con exclusión por primeira vez do resto dos grupos políticos.

O BNG gobernou Fene durante 28 anos e nunca, nin coas 5 maiorías absolutas, excluíu deste xeito á oposición.

Os nacionalistas demandarán na vindeira comisión de persoal ter presenza directa na Mesa xeral de negociación ou do contrario non asumiremos proposta algunha nesta materia. Paralelamente á petición en Comisión, faremos chegar un escrito lembrándolle ao alcalde Gumersindo Galego que moitos temas son de aprobación no Pleno e o PP conta con 6 de 17 actas.

Por outra banda o Grupo municipal do BNG pedirá unha xuntanza coa representación dos traballadores e traballadoras para darlles a coñecer a nosa postura e tamén coñecer as propostas que se propuxeron para o debate.

No BNG pensamos que o PP quere ir aplicando unha política de feitos consumados, contando co apoio activo ou pasivo do PSOE como levan facendo todo este primeiro ano de mandato.