martes, 25 de outubro de 2016

ESQUERDA UNIDA INCORPÓRASE AO GOBERNO MUNICIPAL DE FENE

No día de hoxe o Alcalde de Fene, o nacionalista Juventino Trigo, asinou as resolucións de acaldía que fan efectiva a remodelación do goberno local.

Mari Carmen Martínez, concelleira de EU
O rexedor fixo efectivo o acordo con EU incorporando á concelleira María Carmen Martínez á Xunta de goberno local. A concelleira foi nomeada segunda tenente da alcaldía e Presidenta da Comisión de Dinamización social e transparencia. Dentro desta Comisión farase cargo das delegacións de Benestar social e igualdade, Ensino e Participación e información cidadá, transparencia e comunicación. As delegacións de Cultura, Xuventude e Deportes foronlle asignadas ao concelleiro Justo Martínez Ardá.

No novo organigrama forman parte da Xunta de Goberno Local, Alejandra Permuy Meizoso como primeira tenente de alcalde, Justo Martínez Ardá como terceiro Tenente de Alcalde e Mariela Aguilar Prieto cuarta Tenente de Alcalde.

Grupo Municipal do BNG de Fene
O Alcalde tamén fixo novos nomeamentos, Alejandra Permuy Meizoso Pesidenta  da área de Organización e seguridade, como o viña sendo, mais agora asume a área de Servizos e Mantemento. Justo Martínez Ardá foi nomeado Presidente da área de Desenvolvemento territorial  e Mariela Aguilar permanece como delegada e Medio ambiente. A área de Facenda sigue nas mans do alcalde e incorpora a delegación de Promoción económica.


Desde  o novo equipo de goberno o que se pretende e traballar máis e mellor polo pobo de Fene e cumprir o acordo político asinado.







venres, 7 de outubro de 2016

Aprobadas as subvencións nominativas ás entidades cidadáns

O alcalde Juventino Trigo indicou que a relación de axudas incluíase no proxecto de orzamentos que non se aprobou no mes de agosto


O Goberno do BNG levou ao pleno do Concello de Fene, a concesión de dezanove subvencións nominativas para a realización de actividades de utilidade pública e interese social a diferentes asociación, por un importe total de 47.500 euros, e que foi aprobado por unanimidade.


Dos 47.500 €, 13.300 € destínanse a actividades desenvolvidas por entidades prestadoras de servizos sociais para o funcionamento destas entidades e a realización de actividades de interese social dirixidas a persoas desfavorecidas (ASPANEPS, Cáritas e Amigos de Galicia); 3.500 ao mantemento ou posta en funcionamento de comedores escolares (ANPAS dos CEIP de Centieiras e Os Casais e do CPI A Xunqueira de San Valentín); 15.000 € á organización de festivas musicais (Fenerock, Felipop e Xuntanza de Gaiteiros) e os 31.800 restantes a romarías (O Pote, O Camiñante, Romaría Viquinga) e outro de tipo de eventos e actividades (lavandeiras de Sillobre; ciclo do Nadal de San Valentín; Slalom de Fene; festas do poldro, da orella e da ameixa; Premio Nacional de Poesía Pérez Parallé).

Entre as novidades máis importantes a respecto do exercicio de 2015 cómpre salientar as seguintes:

·       Increméntase a contía total que se dedica ás subvencións nominativas así como o número de entidades beneficiarias.

·       Auméntase a contribución municipal ao mantemento/posta en funcionamento de comedores escolares.

·       Increméntase a cantidade que se destina a entidades prestadoras de servizos sociais.

A concesión de subvencións nominativas é un procedemento previsto na Lei Xeral de Subvencións para contribuír ao financiamento de actividades de utilidade pública ou interese social e regúlanse a través da sinatura dos correspondentes convenios de colaboración.


Pleno do 6 de outubro (Foto: Radio Fene)




venres, 23 de setembro de 2016

Remata a campaña!

Como en todos os procesos electorais o BNG de Fene saiu a rúa e fixo actos en todas as parroquias (de novo fomos os únicos), hoxe toca a última, Perlío, coincidindo co peche da Campaña faremos una Acto Comarcal onde estarán todos os candidatos comarcais ao Parlamento Galego. Será hoxe venres ás 21h. na Praza da Escola (AVV de Perlío) e, tras as intervencións do alcalde Juventino Trigo e os candidatos Manuel Polo e Iago Varela despediremos esta intensa e ilusionante campaña cunha mexillonada. Estades tod@s convidad@s!

Súmate ao "Efecto Pontón". Con ilusión, UN TEMPO NOVO.













venres, 16 de setembro de 2016

O BNG de Fene amosa as súas condolencias pola morte do párroco de Barallobre, don Elías Seoane

Desde o Bloque Nacionalista Galego de Fene poñemos de manifesto o noso pesar polo falecemento de don Elías e a máxima admiración pola súa persoa. Sen dúbida foi un dos maiores defensores do país na nosa comarca, da nosa lingua, da nosa cultura e da nosa xente, tamén en momentos nos que non era fácil selo, e menos desde unha posición como a súa. Durante toda a súa vida foi un comprometido coa sociedade, cos máis desfavorecidos, cos perseguidos, cos necesitados... Comprometido coas persoas e tamén con Galiza.


Por todo isto, e por estar sempre cando e onde o precisamos, moitas grazas e boa viaxe.



Don Elías nunha captura do Vídeo de apoio á Candidatura de Juventino Trigo do 2011



luns, 5 de setembro de 2016

PARALIZACIÓN DO DEBATE SOBRE OS MAIORES ORZAMENTOS DA HISTORIA DE FENE

No pleno do pasado 4 de agosto co voto en contra do Partido Popular e a abstención de Somos Fene e PSOE impediuse a inclusión na orde do día dos Orzamentos para o ano 2016. Isto supuxo a paralización do debate dos orzamentos para 2016 que suporían o maior orzamento da historia de Fene, cunha partida de investimentos en obras que alcanzaba case o millón e medio de euros, repartidos entre todas as parroquias de Fene e acordados co tecido asociativo resulta inexplicable.

Ante esta situación, o alcalde de Fene, o nacionalista Juventino Trigo, decidiu cesar dos seus cargos aos concelleiros/as de Somos Fene e do PSOE por perda da súa confianza neles, o que implica o cesamento nos seus cargos como concelleiros/a delegados no goberno. É a principal consecuencia que se deriva da decisión destes edís de romper por sorpresa unhas negociacións traballadas e consensuadas durante catro meses.

O BNG mantén ao 100% o acordo programático asinado en xuño de 2015 por Somos Fene (SF), PSOE, IU e o propio BNG, no que se establecían unhas liñas de actuación moi claras relativas ao obxectivo básico da promoción do emprego, a mellora dos servizos sociais, a participación cidadá, etc. O programa de actuación política do goberno non vai cambiar; porén, a perda de confianza do alcalde nos seus concelleiros delegados provoca a imposibilidade de seguir contando cos mesmos para o exercicio da citada actuación. Así as cousas, o alcalde e o BNG manteñen a porta aberta ao diálogo con todos os grupos da corporación para que, unha vez aclaradas de xeito interno en cada organización as razóns polas que romperon os acordos e faltaron á súa palabra votando en contra dun instrumento básico de traballo como é o orzamento, se poidan establecer novos acordos para facilitar a gobernabilidade do municipio.

O grupo municipal do BNG amósase disposto a gobernar en minoría ou a asumir calquera consecuencia que se derive desta decisión. Tal e como declarou Juventino Trigo en rolda de prensa, “somos conscientes da aritmética municipal e da situación na que queda o pleno, son alcalde por elección maioritaria do pleno e sei perfectamente que preciso apoios para aprobar asuntos, pero non vou ser alcalde a calquera prezo, e prefiro ter que negociar cada decisión e triplicar o meu traballo e o dos meus compañeiros e compañeiras antes que someterme aos ditados de persoas que faltan á súa palabra e que perseguen outros intereses que nada teñen que ver co benestar da veciñanza”.

As razóns de fondo

A Responsábel local do BNG, Digna Falado, afirma que a obstrución á xestión do Alcalde a quen prexudica é ao pobo de Fene. As razóns de fondo derivan de que os portavoces do PSOE e SF miraron polos seus intereses particulares, mentindo e faltando á súa palabra. Por unha banda, o portavoz socialista como delegado de Obras e Servizos leva un ano sen poder facer uso da súa dedicación exclusiva, desatendendo as competencias. E o portavoz de Somos Fene nin aclara nin resolve os embargos sucesivos das súas remuneracións municipais por parte do xulgado por impago a traballadores, feito que ocultou ao asinar o pacto de goberno. Ademais, Somos Fene solicitou a última hora unha dedicación exclusiva para o seu concelleiro César Castro, asegurando que de non concederlla votarían non ao orzamento.
Desatención da veciñanza, desinterese total polo traballo municipal, primar intereses particulares e faltar á palabra dada paralizan a acción dun goberno que non se pode permitir estas actuacións, e que debe seguir traballando para consolidar en Fene as políticas progresistas e de traballo para o pobo que comezaron co alcalde Juventino Trigo.

Reflexionando

Que ocorre agora? O BNG vai seguir gobernando, mantendo o acordo programático asinado e esforzándonos en chegar a acordos.

Pódese gobernar con 4 edís? Con dificultade pero é posíbel. O BNG gobernou Fene de 1979 a 1983 con 4 concelleiros e logo viñeron 5 maiorías absolutas.

Que ocorre cos Orzamentos 2016? Pois neste ano manteranse prorrogados os de 2015 coas incorporacións de diñeiro procedente de subvencións, convenios ou outros ingresos.

Que fixo o PP? A río revolto… O PP pasou de aceptar o debate dos orzamentos o luns a votar en contra o xoves, veulles moi ben non debater o proxecto de orzamento, non tiveron que explicar como votar non a un documento moi bo.

Esixe o BNG dimisións dos exsocios? Non, son as organizacións de cada quen as que deben pedir contas aos seus cargos.

Quen se prexudica máis coa falla de orzamento? As persoas no desemprego, incluíamos un Plan de emprego que terá que agardar ao vindeiro ano.

E as obras acordadas coas sociedades e os outros grupos políticos en que quedan? Faranse todas xa que teñen orixe en Plans de obras que financia a Deputación e a Xunta.



domingo, 4 de setembro de 2016

Pancho Allegue, na nosa lembranza sempre


Dende o BNG de Fene non queremos deixar pasar estas datas sen facer unha lembranza do noso compañeiro Pancho Allegue, que falecía a noite seguinte á Festa Mariñeira de Fene, o 4 de setembro de 2005, dun paro cardíaco, con só 46 anos de idade.

Sindicalista, traballador e defensor incansable do noso sector naval e concelleiro nacionalista de Fene durante 18 anos seguidos, foi e será sempre un referente e un exemplo a seguir para todos/as nós. O seu legado de traballo incansable, de proximidade co pobo e, sobre todo, de limpeza e honestidade, segue moi presente entre os compañeiros e compañeiras do Bloque de Fene.

Alá onde esteas, moitas grazas.









mércores, 10 de agosto de 2016

O alcalde de Fene cesa dos seus cargos aos concelleiros/as de Somos Fene e do PSOE por perda da súa confianza neles

O alcalde de Fene, o nacionalista Juventino Trigo, vén de revocar a delegación das súas competencias nos concelleiros do Partido Socialista e de Somos Fene, o que implica o cesamento nos seus cargos como concelleiros/a de goberno. É a principal consecuencia que se deriva da decisión destes edís de romper por sorpresa unhas negociacións traballadas e consensuadas durante catro meses e paralizar, no pleno ordinario do pasado 4 de agosto, o debate dos orzamentos para 2016, que suporían o maior orzamento da historia de Fene, cunha partida de investimentos en obras que alcanzaba case o millón e medio de euros, repartidos entre todas as parroquias de Fene e acordados co tecido asociativo.

foto: Galicia Ártabra
Deste xeito, as competencias exercidas por estes cinco edís cesados regresan de novo á alcaldía. O grupo nacionalista mantén ao 100% o acordo programático asinado en xuño de 2015 por Somos Fene, PSOE, IU e o propio BNG, no que se establecían unhas liñas de actuación moi claras relativas ao obxectivo básico da promoción do emprego, a mellora dos servizos sociais, a participación cidadá, etc. O programa de actuación política do goberno non vai cambiar; porén, a perda de confianza do alcalde nos seus concelleiros delegados provoca a imposibilidade de seguir contando cos mesmos para o exercicio da citada actuación. Así as cousas, o alcalde e o BNG manteñen a porta aberta ao diálogo con todos os grupos da corporación para que, unha vez aclaradas de xeito interno en cada organización as razóns polas que romperon os acordos e faltaron á súa palabra votando en contra dun instrumento básico de traballo como é o orzamento, se poidan establecer novos acordos para facilitar a gobernabilidade do municipio.

O grupo municipal do BNG amósase disposto a gobernar en minoría ou a asumir calquera consecuencia que se derive desta decisión. Tal e como declarou Juventino Trigo en rolda de prensa, “somos conscientes da aritmética municipal e da situación na que queda o pleno; son alcalde por elección maioritaria do pleno e sei perfectamente que preciso apoios para aprobar asuntos, pero non vou ser alcalde a calquera prezo, e prefiro ter que negociar cada decisión e triplicar o meu traballo e o dos meus compañeiros e compañeiras antes que someterme aos ditados de persoas que faltan á súa palabra e que perseguen outros intereses que nada teñen que ver co benestar da veciñanza”.






mércores, 3 de agosto de 2016

Fene leva a aprobación o maior orzamento da historia do municipio con preto de doce millóns de euros

O Pleno do Concello de Fene debaterá mañá xoves, ás 18 horas, a aprobación dunhas contas que acadan case os 12 millóns de euros para este ano 2016. Concretamente, 11.861.782,18 € de gastos e de ingresos. O documento recolle as principais propostas do goberno local, como son, a blindaxe da política social cun Plan de emprego financiado con 120.000 € e o incremento das partidas de benestar social, especialmente significativa a que corresponde á atención á dependencia. 

Outro capítulo de vital importancia é o das obras que, por primeira vez en moitos anos, acada os 1.458.700,57 €. Hai que retrotraerse aos anos 2006 e 2007 para encontrar cifras de investimentos de importancia semellante, coa diferenza de que naqueles anos estaban financiadas en parte con cretos bancarios e, na actualidade, o Concello de Fene sigue a reducir débeda bancaria nun -26%. As contas tamén recollen o incremento salarial do persoal no 1%, tratándose do primeiro incremento salarial dende 2011.

Os ingresos proveñen nun 58,25% dos impostos e taxas que paga a veciñanza e as empresas, un 30% de transferencias do Estado e un 9% de subvencións, que supoñen esta últimas máis dun 328% de incremento con respecto ao exercicio anterior.

Para o alcalde de Fene e responsable da área de Facenda, o nacionalista Juventino Trigo, “estas contas son un salto moi importante na prestación de servizos públicos e na execución de obra pública, cun notable esforzo na dinamización da economía e na creación de emprego”.







mércores, 13 de xullo de 2016

Agustín Fernández Paz, o teu compromiso coa lingua e o contributo á cultura do país sempre nos acompañarán.

(nota da Alcaldía extraída da páxina www.fenecidadan.gal)

O alcalde de Fene, Juventino Trigo Rey, amosou a súa  enorme tristura polo falecemento do escritor Agustín Fernández Paz:  

Unha persoa á que no Concello de Fene lle estaremos sempre agradecidos.
Nos anos que residiu na comarca de Ferrolterra, Agustín, á fronte do colectivo de mestres Avantar, foi un dos artífices dos primeiros libros de texto para o ensino do galego, “O noso galego”, libros que en boa parte se xestaron nas instalacións do CEIP O Ramo. 
No ano 1984, cando o Concello de Fene, comezou o proceso de normalización lingüística na administración local, Agustín foi unha das persoas que asumiu os labores de normalización, modernización e adaptación á linguaxe non sexista da documentación administrativa así como da formación do funcionariado. Tamén nos primeiros anos de Radio Fene, Agustín e Inma dirixiron un programa divulgativo sobre a nosa lingua e cultura que levaba por título “A Fervenza”. 
Moitas máis foron as súas colaboracións co Concello, a última, por estas mesmas datas do ano 2007, Agustín foi o autor da declaración institucional do “Día da Patria Galega”, unha declaración que remataba cos versos de Manuel María, chairego como Agustín e o autor ao que neste 2016 se lle dedican as Letras Galegas, que reproduzo deseguido:

“Galicia somos nós:
a xente e maila fala.
¡Se buscas a Galicia
en ti tes que atopala!”



Agustín Fernández Paz



luns, 11 de xullo de 2016

A Xunta de Galiza recorta en formación para o emprego en Fene e nos concellos agrupados

A Concelleira de emprego e portavoz do BNG de Fene, Sandra Permuy, lamenta o recorte en formación para o emprego realizado pola Consellería de traballo da Xunta de Galiza.
Para a portavoz nacionalista é sorprendente que neste ano non se concedese o Obradoiro que estaba solicitado para o programa de garantía xuvenil que si se tiña realizado en anos anteriores. Este Obradoiro xuvenil garantía a formación a rapaces e rapazas que non tiñan rematada a ESO.
Por outro lado nos Obradoiro de emprego ordinarios nas que se viña traballando coa agrupación de Ares e Cabanas e que neste ano se sumaron Mugardos e Neda a redución foi de 3 obradoiros en 2015 a 2 obradoiros en 2016 pasando de 28 a 20 alumnos e alumnas.

ANO
TIPO 
 OBRADOIRO
CONCELLOS
ALUMNOS / ESPECIALIDADES
PARO CONCELLOS
TOTAL PARO CONCELLOS PARTICIPANTES
2014
Obradoiro ordinario
Fene / Ares / Cabanas
21alumnos / 3 especialidades
Ares :574  / Fene:1340 / Cabanas: 268
2.182
2015
Obradoiro programa garantía xuvenil
Fene / Ares / Cabanas
28 alumnos / 3 especialidades
Ares :492  / Fene:1203 / Cabanas: 240
1.935
2016
Obradoiro ordinario
Fene / Ares / Cabanas / Neda
Mugardos
20 alumnos / 2 especialidades
Ares :461 / Fene:1098 / Cabanas: 196/Neda:406 / Mugardos:456
2.617



Desde o goberno municipal traballarase na formación polo emprego tomando iniciativas potentes ademais de esixir á Xunta que cumpra coas persoas desempregadas do noso concello.


Sandra Permuy, Concelleira de Emprego


luns, 13 de xuño de 2016

1 ano de goberno encabezado polo BNG

Hoxe cúmprese un ano da investidura de Juventino Trigo como alcalde de Fene, lembramos o seu discurso:


Foto: Fenecom
Bo día a todos e todas, agradézovos en nome de toda a nova corporación a vosa asistencia a este acto tan importante.

O pobo de Fene expresou a súa vontade nunhas eleccións plurais,   abertas e con incerteza no resultado se cadra máis que noutras ocasións.
Algo semellante ao ano 1979 cando se constituíron as primeiras corporacións democráticas logo de 40 anos de ditadura.



É importante este acto porque refrenda algo elemental, a pluralidade de ideas e de opinións, formas de ver as cousas e de melloralas.

Cando remate este mandato que hoxe comeza, levaremos 40 anos continuados de concellos democráticos con alcaldes como Xosé Maria Rivera, Iván Puentes e Gumersindo Galego, que sendo de ideoloxías diferentes puideron exercer o seu cargo libremente.

É importante este acto, porque o alcalde de Fene en 1936 Ramón Souto xunto con gran parte da corporación, secretario incluído, foron asasinados o día da Galiza mártir, 17 de agosto do 1936 no castelo de San Felipe, porque pensaban diferente, e iso é algo que non podemos esquecer e que sempre o debemos ter na memoria.
Por isto o meu primeiro agradecemento é para todas as persoas que loitaron por facer un mundo mellor, pola igualdade de dereitos das persoas e dos pobos, a todas sen distinción vai este meu agradecemento.

O meu segundo agradecemento ten que ir para todo o pobo de fene que nun exercicio cívico exerceu o seu dereito ao voto e se comprometeu co proceso democrático.

O meu tercerio agradacemento vai a todos os compañeiros de corporación os que o foron, especialmente para Manuel Polo, Rita Couto e Inés Roca, e aos que vos incorporades; sei que coa vosa colaboración sacaremos a Fene adiante.

Para min é un día moi especial. Cando me chamaron os do BNG para encabezar a candidatura hai 4 anos eu non era militante do BNG, non participaba activamente en política. Pero sentín unha responsabilidade cara o noso pobo e sobre todo sentín unha cousa, xa está ben de criticar e non facer nada. Algo que por desgraza está moi ao día, criticalo todo e non comprometerse a nada.

Din o paso, aceptei, sabendo que era unha gran responsabilidade. Hoxe podo afirmar que o paso foi acertado, a miña aspiración política comeza e remata en Fene; propóñome ser alcalde de toda a veciñanza.
A porta do concello estará aberta e farei o que prometín en campaña, TRABALLAR, algo que levo facendo dende os 14 anos.      
Non o farei só, aquí estamos 17 mulleres e homes que conformamos a corporación e que estou seguro que defenderemos e proporemos o mellor para Fene.

Anúnciovos tamén que temos asinado dous acordos, un programa político entre EU, Somos Fene, PSdeG-PSOE e o BNG-AA,  e un acordo de goberno entre Somos Fene, PSdeG-PSOE e o BNG.
Quero agradecer especialmente a altura de miras e a enorme xenerosidade de EU e a súa concelleira, Mari Carmen Martínez, que coa súa actitude conseguiron que estes acordos saíran adiante.

Estes acordos garanten un goberno estable e con amplo apoio popular e que nace do acordo das partes asinantes. Resumidamente  neste acordo temos as seguintes liñas prioritarias de actuación.

1) PARTICIPACIÓN VECIÑAL, INFORMACIÓN, TRANSPARENCIA
2) EMPREGO
3) BENSTAR SOCIAL, DEPENDENCIA E IGUALDADE
4) UN CONCELLO SOSTIBLE CON SERVIZOS BÁSICOS UNIVERSAIS
5) CULTURA, LINGUA E DEPORTES  
6) URBANISMO, VIVENDA  E OBRAS
7) REDISTRIBUCION DE RECURSOS, TAXAS, IMPOSTOS, AXUDAS E BECAS.
8) XESTIÓN CON OUTRAS ADMINISTRACIÓNS

Como dixen antes, estas liñas de actuación xunto co organigrama serán feitos públicos polo conxunto do goberno. (xa está nas redes socias en gran parte)
En 15 días teremos o Pleno organizativo e nese se verá a forza deste goberno.
Hoxe remato xa, foi a elección da Alcaldía, cargo que exercerei para o ben de Fene, implicando o mellor de min pero sobre todo sacando o mellor da corporación que hoxe tomou posesión e do conxunto do persoal municipal sen o cal, as palabras dificilmente pasarían a ser realidades.

Moi bo día e VIVA FENE!!






xoves, 19 de maio de 2016

Os trámites para a limpeza da RUBBER inciados en 2014 culmirán a finais deste ano segundo a Consellería de Medio Ambiente

O BNG de Fene celebra que se axilice o proceso de retirada de pneumáticos da antiga RUBBER, que conta cun expediente aberto e en tramitación desde principios do ano 2014




Unha actuación de oficio por parte da policía autonómica a comezos de 2014 supuxo o inicio das actuacións administrativas para a retirada dos residuos da vella industria de recauchutados. Foi entón cando desde o Concello se iniciaron os contactos coa Consellería de Medio Ambiente que, asumindo as súas competencias, comezaba os trámites pertinentes, que teñen previsto rematar neste mesmo ano. 

De todos xeitos, e dada a alarma social creada tralo incendio de Seseña, o alcalde, Juventino Trigo, vén de solicitar unha reunión coa Consellería para coñecer de primeira man o avance dos traballos.



Mentiras e oportunismo

O BNG de Fene quere desmentir acusacións de membros de novas formacións, inexistentes en Fene no momento no que comezaron os trámites de retirada dos residuos, de que o Concello dá “a calada por resposta”, xa que a solicitude destes grupos para acceder ao expediente completo do asunto foi estimada e contestada menos dun mes despois da entrada en rexistro da mesma (o 29 de xullo de 2015). Polo tanto, son perfectamente coñecedores de todas as actuacións realizadas e dos pasos previstos a dar ata a retirada final dos pneumáticos.  Ademais, membros destas novas formacións que agora critican que se permitira a instalación dunha fábrica deste tipo preto do centro urbano foron directamente responsables, no seu día, da concesión desta licenza.

O BNG de Fene lamenta a pobreza argumental e mentireira destes grupos e agarda que o problema latente da antiga RUBBER se solucione o antes posible.







martes, 26 de abril de 2016

Asemblea Aberta en Fene


Este xoves, día 28 de abril ás 19 horas no local da Asemblea do BNG de Fene terá lugar unha asemblea aberta a toda a veciñanza de Fene e arredores englobada dentro do proceso "Adiante" que se está a facer en todo o país e que ten un dobre obxectivo: 

Por unha banda, iniciar, desenvolver e culminar o debate sobre a refundación do nacionalismo galego aprobado na XV Asemblea Nacional do BNG baixo a premisa de reactivar, reactualizar, reforzar e relanzar o proxecto nacionalista en Galiza. 

Por outra, que o proceso, ademais dun medio, sexa un fin en si propio que serva para dinamizar o funcionamento interno do BNG, motivar, reconectar e reilusionar o conxunto da militancia e poder incorporar homes e mulleres que, sen militaren na organización, comparten connosco a necesidade de que exista na Galiza unha expresión política propia nacionalista. Ademais debe ser unha oportunidade para demostrar -unha vez máis- que o BNG non ten parangón en termos de pluralidade de ideas, debate interno, asemblearismo e funcionamento democrático.

Acude e convida a quen consideres... ADIANTE!





luns, 11 de abril de 2016

Visita do Presidente da Xunta de Galiza ás escolas infantís do Concello




Discurso de recibimento e demandas do Alcalde de Fene, Juventino Trigo ante o Presidente da Xunta de Galiza, Alberto Núñez Feijoó na súa visita ás escolas infantís do Concello:



"Como alcalde de Fene e en nome da Corporación Municipal que represento, quero dar a benvida e agradecer en primeiro lugar a visita que hoxe realiza a Fene o Señor presidente da Xunta de Galiza, D. Alberto Núñez Feijoo. 

Sr. Presidente; como vostede comprenderá, os alcaldes temos a obriga de pedir, reclamar e xestionar; e neste momento, como vostede mismo apreciará, necesitamos a urbanización da Estrada do Ramo, dependente da Xunta, para favorecer o acceso a toda esta zona dotacional do Ramo. 

Urxe a posta en marcha polo Consorcio da escola infantil do Carril prevista para setembro 2016; e polo tanto necesitamos sentarnos a falar coa Consellería da xestión desta nova escola, e solucionar o contencioso relativo aos gastos para a xestión da Escola Infantil de Perlío.

E por suposto, para encher estas escolas fan falla nenos e nenas, e para iso ten que haber emprego, algo tan escaso na nosa comarca; polo que lle pedimos un esforzo máximo nese cometido. 

Moitas Grazas."

























domingo, 20 de marzo de 2016

O BNG de Fene renovou o seu Consello Local

Con algunha nova incorporación e renovando a confianza para a dirección na persoa de Digna Faraldo, o novo Consello Local foi elixido en asemblea de militantes na tarde do pasado xoves, 18 de marzo, por unanimidade de votos dos e das asistentes. Nos primeiros minutos da súa elección, o novo órgano de dirección local do BNG xa asumiu como principal e inmediata a tarefa de servir de apoio ao grupo de concelleiros e concelleiras que forman parte do goberno do Concello, comezando por facer unha rolda de reunións coas sociedades e asociacións de Fene, tal e como o BNG vén facendo de xeito habitual pero, nesta ocasión, se cabe, con máis razón de ser, dada a responsabilidade actual do Bloque no Concello.


O novo Consello Local do BNG de Fene queda composto polas seguintes persoas:

Digna Faraldo, Cristina García, Luis Seijo, Sandra Permuy, Alberto Maceiras, Ledicia Trillo, Manuel Polo e Xesús Cea. Como suplentes, Xosé Antonio García e Rita Couto, e como membros “por dereito” pola súa condición de concelleiros/as, Juventino Trigo, Mariela Aguilar e Justo Martínez-Ardá. Ademais, Néstor Fernández continúa no órgano como representante de Galiza Nova. 






luns, 14 de marzo de 2016

Avanzan os traballos do obradoiro de emprego “INICIA” que se desenvolve en Fene

A Concelleira de Formación e Emprego, Sandra Permuy, realizou unha visita esta mañá aos traballos que realiza no Concello de Fene o alumnado do Obradoiro de Emprego de Garantía Xuvenil “INICIA”, das especialidades de “Pintura industrial en construcción” e “Fabricación e montaxe de instalacións de tubería industrial”. En concreto, ramataron xa o pintado exterior da A.VV. Santo Samarco na parroquia de Sillobre e, actualmente, están coa colocación dos pasamáns das escaleiras de baixada do Colexio do Ramo, en Barallobre. A concelleira estivo acompañada pola directora do Obradoiro, Mª Carmen Yáñez, quen lle explicou in situ o progreso das actuacións.



O Obradoiro de Emprego “INICIA” foi concedido pola Consellería de Economía, Industria e Emprego, e desenvólvese a través dun convenio de colaboración entre os Concellos de Fene, Ares e Cabanas. Comenzou o 30 de setembro de 2015 e remata as súas actuacións o vindeiro 29 de marzo. Está integrado por 28 alumnos e alumnas (17 de Fene, 8 de Ares e 3 de Cabanas), unha directora, tres docentes das especialidades, unha docente de ensino básico e unha docente de formación empresarial.



xoves, 18 de febreiro de 2016

O goberno de Fene propón á Deputación varios proxectos de seguridade viaria en estradas provinciais

O responsable de infraestruturas viarias e varios técnicos visitaron a estrada da Armada

 e zonas de Barallobre e Magalofes


O goberno local de Fene recibiu na mañá de onte ao responsable provincial de Intraestruturas viarias, vías e obras provinciais e Medio Ambiente, José Manuel Pequeño. A cita tivo como obxectivo facer entrega de expedientes, memorias e proxectos elaborados polo goberno municipal e considerados como de alto interese para o municipio, como é a habilitación dunha senda peonil na estrada da Armada (Maniños), outra en Magalofes desde a igrexa ao local social e unha máis desde os institutos de Barallobre e ata o cemiterio municipal. Isto permitiría o tránsito de peóns de xeito seguro nestas zonas, onde o paso a pé é moi frecuente. Ademais, na contorna dos institutos tamén se proxecta a mellora da seguridade viaria con nova sinalización lumínica e pasos de peóns elevados.

O alcalde, Juventino Trigo, o tenente alcalde e concelleiro de servizos, Antón Noceda, e a concelleira de Tráfico e Seguridade Viaria, Sandra Permuy, acompañaron a José Manuel Pequeño e aos técnicos nunha visita ás tres zonas, onde puideron comprobar de primeira man a necesidade de acometer estas obras. De feito, segundo declarou o alcalde “amosaron moi boa disposición e actitude activa de colaboración”. Polo tanto, Juventino Trigo agarda “que poidan comezar moi pronto con algunha destas obras, todas elas vellas demandas veciñais e moi necesarias para garantir a seguridade das persoas que camiñan por estes lugares”.


Plans Provinciais ao día

Estas obras, a realizar de xeito directo pola Deputación, completaranse cos plans provinciais a executar polo Concello, que xa están a ser consensuados coas sociedades e listos para ser presentados e aprobados. Polo tanto, en palabras do alcalde “o actual goberno ten os plans provinciais de 2015 executados e moi avanzado o proxecto para 2016, o cal significa que estamos ao día na realización destas obras, a pesar do que queira dar a entender o Partido Popular, que o único que fai é falar do pasado”.




martes, 16 de febreiro de 2016

Medio Ambiente proxecta a construción dunha área recreativa con parque para cans en San Valentín

A concellería de Medio Ambiente de Fene traballa xa na posta en marcha dunha grande área recreativa a carón da praia de San Valentín. Contará con zona de barbacoas e mesas, parque infantil e biosaudable e máis un parque para cans, o primeiro que existirá no municipio fenés.

Trátase dun proxecto a realizar en dúas fases, cun orzamento total de 125.000 euros, e a primeira delas dará comezo antes do verán. A concelleira de Medio Ambiente, Mariela Aguilar, sinala que “se trata dun proxecto consensuado co tecido asociativo de San Valentín”, e que “vai contribuir ao obxectivo programático do goberno de construir un municipio do século XXI”.


Mariela Aguilar
Concelleira de Medio Ambiente


O temporal pasa por Perlío sen inundacións do río Cádavo

Por outra banda, as xestións da concellería de Medio Ambiente para evitar as constantes inundacións do río Cádavo en Perlío resultaron efectivas nesta ocasión, dado que a limpeza do cauce conseguiu que o último temporal de auga pasara pola localidade sen provocar inundación ninguna.





venres, 5 de febreiro de 2016

A nova ordenanza de usos de Vilar do Colo xerará novos proxectos de emprego en Fene


A entrada en vigor da ordenanza de usos do Polígono Industrial de Vilar do Colo o pasado mes de decembro implicará a xeración de arredor de medio cento de postos de traballo no parque empresarial fenés. O feito de poder ampliar usos permitirá que se xeren actividades de tipo complementario ao industrial e novos usos como o comercial, social ou hostaleiro, entre outros. En concreto, trabállase xa na posta en marcha dun tanatorio, e na construción dun hotel e dunha superficie comercial dunha cadea de alimentación. Ademais, xa están a funcionar un establecemento de hostalería e máis unhas instalacións deportivas de pádel.


Para o alcalde de Fene, Juventino Trigo, trátase dunha oportunidade para que novas empresas se radiquen no municipio en igualdade de condicións grazas as normas aprobadas no Pleno de novembro pasado. 

En palabras do alcalde ”ao chegar ao goberno tiven que clausurar actividades que non estaban permitidas pero que alguén autorizou verbalmente, que xeraron inseguridade xurídica e desigualdade entre as persoas emprendedoras. Porén, nestes momentos todas os proxectos e actividades son legais e contan con toda a solvencia normativa precisa.”



Por último o alcalde de Fene, Juventino Trigo, lamenta a oposición revanchista do PP cando tiveron 4 anos para aprobar a Ordenanza de usos de Vilar do Colo que, co actual goberno, se fixo en poucos meses.












xoves, 28 de xaneiro de 2016

Visita a Navantia-Fene

Representantes do Goberno Municipal de Fene visitaron o pasado día 27 de xaneiro as instalacións de Navantia-Fene. Visita na que estiveron acompañados da dirección de Navantia Fene e responsabeis da empresa Windar Renobables.


Durante a xornada o alcalde, Juventino Trigo, coñeceu de primeira man os traballos desenvolvidos por la UTE Winder-Navantia. Isto é proxectos eólicos (Jacket e Hywind) desenvolvolvidos nos talleres de Imenosa, bloques planos e grada.

Durante a visita acadouse o compromiso de colaboración entre a empresa e o Concello en temas de  formación e emprego así como se comprobaron as obras de mellora que están a desenvolver no astelerio.