O BNG xa ten equipo para que Fene funcione de novo

O Bloque de Fene presentou o 6 de abril, cando se cumpreu un ano da moción de censura, a súa candidatura para as eleccións municipais do vindeiro 26 de maio. Foi no local da ACRD O Pote de Maniños nun acto arroupado por moitos veciños e veciñas.

O acto foi presentado pola responsábel local, Digna Faraldo, quen cualificou a moción de censura do PP coa Marea - Somos Fene como “un dos feitos máis noxentos da política municipal deste Concello” e asegurou que “hoxe estamos aquí de novo para que, co voso apoio, fagamos que algo así non volva repetirse xamais.”

Participou tamén o cabeza de lista do BNG pola provincia de A Coruña para as eleccións xerais, Néstor Rego, que amosou ao seu apoio á candidatura de Juventino Trigo para Fene e recalcou que a comarca, a pesar dos diferentes procesos de reconversión, conta cun gran potencial para a construción naval pero necesita dun “novo impulso” para a construción naval civil con carga de traballo e novos empregos, compromiso que o BNG defenderá no Congreso de maneira prioritaria. 

Tamén Ana Miranda, candidata ás eleccións ao Parlamento europeo que se celebrarán conxuntamente coas municipais o 26 de maio, enviou o seu arroupamento ao BNG de Fene a través dun vídeo:

https://youtu.be/qYn4tdpoGjA

Devolver a dignidade ao Concello de Fene

Pola súa parte, o candidato á alcaldía de Fene, Juventino Trigo apelou ao cambio iniciado polo BNG até o 6 de abril de 2018 cando un pacto entre o Partido popular e da Marea-Somos Fene, “arrebataron a alcaldía ao BNG.”

O 26 de maio, dixo Trigo, temos unha oportunidade para reiniciar os proxectos que foron paralizados despois da moción de censura, e comprometeuse a recuperar e reforzar os servizos públicos con “reposición de postos de traballo a través de ofertas públicas de emprego”. Tamén fixo fincapé na necesidade de acadar un “Fene democrático, participativo e transparente” e o BNG, afirmou, dará ese novo poder de participación e decisión á veciñanza. Potenciaremos unha páxina web “da transparencia” e para a comunicación do goberno local cos veciños e veciñas de Fene.

Trigo adiantou medidas para a xeración de emprego, entre as que destacou, a posta en marcha de Plans de emprego municipal en coordinación con outras administracións. A inclusión social e igualdade, engadiu, serán prioritarias para o BNG dende o concello.

Candidatura do BNG de Fene ás Eleccións Municipais 2019

Para Juventino Trigo é necesario “rematar cos anos máis grises da política fenesa” polo que pediu o apoio ao BNG para facer “un concello transparente e no que os recursos sexan investidos con rigor e equidade”. En definitiva, devolver a dignidade ao Concello de Fene.

As obras xestionadas e iniciadas polo anterior goberno encabezado polo BNG contan con deficiencias e carencias en seguridade

As obras do plan provincial POS 2017, xestionadas e iniciadas polo goberno do BNG de Fene con Juventino Trigo á cabeza, están a ser executadas nestas datas en varios puntos do Concello, aínda que con bastantes deficiencias e carencias en seguridade, como se pode observar.

Tamén a obra de adecuación da marxe do río Cádavo ao seu paso por Perlío, comprometida por Juventino Trigo coa súa veciñanza e xestionada e iniciada polo seu goberno, está sendo realizada, a pesar de que acumula un importante retraso derivado da deixadez e inoperancia do actual goberno PP-Tránsfugas da Marea, que están moito máis preocupados por ver cal é o mellor xeito de manterse como concelleiros no goberno a partir das eleccións de maio.

Propostas do BNG de Fene para as obras do POS 2019

Posto que nos últimos meses nunca fomos convocados polo alcalde nin por concelleir@s do goberno para tratar as obras a executar no próximo POS 2019, hoxe o Grupo Municipal do BNG presentou no concello diversas propostas logo de ter mantidas reunións coa veciñanza e distintas asociacións. Unha parte das obras relacionadas xa teñen proxectos e outras os trámites realizados.

Ligazón ao album de Facebook: aquí

Actividade para conmemorar o 25N

COMUNICADO DO CONSELLO LOCAL DO BNG DE FENE

Hai unha semana, o alcalde e líder do PP local, Gumersindo Galego, e Xoán Manuel Rodríguez Bastida, de Somos Fene, fixeron varias declaracións aos medios referidas a dúas sentenzas recibidas polo Concello en relación cos procedementos que se viñeron seguindo nos últimos meses para aclarar a pertenza ou non dos edís de Somos Fene ao grupo dos non adscritos e tamén para pronunciarse sobre a suspensión do pleno de moción de censura do mes de outubro por parte da presidenta da Mesa de Idade.

Antes de facer ningún comentario ao respecto, o Grupo Municipal do BNG quixo coñecer de primeira man o contido exacto de ambas sentenzas. Por ese motivo solicitámoslle formalmente á alcaldía que se nos facilitase copia das dúas resolucións, máis aínda cando o propio Gumersindo Galego anunciou na súa comparecencia ante os medios que as sentenzas estarían dispoñibles para toda a veciñanza de Fene. 

Porén, os días pasan e, igual que ocorre con outra información solicitada ao novo executivo PP-Somos Fene, só obtemos o silencio por resposta, negándosenos por omisión o acceso a información que temos dereito a recibir e que, curiosamente, si se lles traslada aos medios de comunicación (as sentenzas están na web de Radio Fene). Nada novo, tendo en conta o período de escurantismo no que entrou Fene tralo asalto ao poder dos populares e os seus socios da Marea o pasado 6 de abril.

Deste modo, a única referencia ao contido dos ditames xudiciais da que dispoñemos son as palabras de Galego e Bastida recollidas por Radio Fene a semana pasada, nas que fan varias afirmacións que deben ser respostadas pola nosa banda ante as numerosas imprecisións que conteñen e as graves acusacións que se dirixen a membros deste grupo municipal.

Na intervención gravada, Rodríguez Bastida relata de viva voz parte do texto da sentenza do Tribunal Superior de Xustiza de Galicia na que este órgano viría ratificar a súa pertenza ao Grupo Municipal Somos Fene.  Como se lembrará, o PDDG -partido polo que Bastida e César Castro concorreron as municipais- revogoulles a representatividade trala primeira tentativa de moción de censura, aló polo mes de xuño de 2017. A raíz da expulsión dos dous edís do seu partido matriz, que en ningún momento supuxo a perda das súas actas como concelleiros, deuse conta no pleno de agosto dese ano do seu paso ao grupo dos non adscritos. Esta medida adoptouse por unha resolución da alcaldía seguindo informes técnicos da Secretaría municipal -en aplicación da interpretación técnica da normativa electoral e a xurisprudencia existente-, non por unha decisión arbitraria e unilateral de Juventino Trigo nin do goberno do BNG como quere facer ver o representante de Somos Fene na súa intervención ante os medios.  

A resolución  foi recorrida no xulgado por Bastida e Castro e, finalmente, foi suspendida cautelarmente polo Contencioso Administrativo nº 1 de Ferrol. Ante esta situación, a Deputación da Coruña a instancias do Concello -non o BNG nin Juventino Trigo a título persoal-, Esquerda Unida e Participación Democrática Directa de Galicia acudiron ao Tribunal Superior de Xustiza de Galicia para que se pronunciase sobre se Xoán Manuel Rodríguez e César Castro debían ser considerados ou non Grupo Municipal Somos Fene. Agora -sete meses despois de que a moción prosperase- o tribunal seica confirma a conformación do grupo cunha sentenza que é recorrible ante o Supremo, aínda que intuímos que o Concello non vai dar ese paso malia que o seu deber como institución sería esgotar a vía xurídica. Respectamos as sentenzas, aínda que non as compartamos por entender neste caso que si se vulnerou a normativa electoral e, sobre todo, porque o mantemento do grupo para Somos Fene sen que mediase sentenza firme significou a cadratura numérica coa que se perpetrou un asalto ao poder e unha traición ao electorado por parte de quen viñan para "mudalo todo". 

O Concello, como institución situada por riba das persoas que están gobernando, abandeirou daquela a defensa da legalidade. Unha defensa que tería que continuar ata o remate do seu percorrido por dúas razóns: despexar calquera tipo de dúbida legal e despexar calquera tipo de dúbida sobre o compromiso dos actuais gobernantes coa institución. Non vai ser así, xa vimos non hai moito tempo como o bipartito PP-Somos Fene botaba terra sobre o asunto das farolas deixando correr os prazos de recurso. O PP conseguiu tapar con argucias procedimentais as súas propias miserias, sen importarlle o máis mínimo a mancha que lle queda á institución nin as incógnitas que deberían ser resoltas por respecto á veciñanza.  

A intervención de Xoán Manuel Rodríguez Bastida diante dos micrófonos radiofónicos para explicar o contido da sentenza estivo secundada polo seu socio, Gumersindo Galego, quen cualifica a actuación do Concello ao apelar perante o TSXG como "un atropelo" dos dereitos dos edís de Somos Fene. O líder do PP suxire que ese foi un dos motivos para presentar a moción de censura, obviando na súa intervención que a primeira tentativa de rexistrala -en xuño de 2017- se produciu antes de que Bastida e Castro fosen expulsados do partido instrumental PDDG.  Gumersindo Galego defende que a moción foi adiante no momento en que estes concelleiros "tiñan devoltos os seus dereitos", pasando por alto tamén que daquela -e aínda hoxe- non existía sentenza firme sobre a súa condición de non adscritos.

Porén, o motivo dos comentarios do actual alcalde popular non vén ao caso da situación de Somos Fene, senón doutra sentenza do Contencioso Administrativo nº1 de Ferrol a raíz da denuncia do PP contra a decisión da Mesa de Idade de suspender o pleno de finais de outubro de 2017 en que se ía debater por primeira vez a moción de censura. De novo temos unha sentenza que respectamos, aínda considerando que vai en contra do interese xeral ao xulgar que a sesión debería ter continuado en vez de ser levantada co voto de calidade da presidenta da Mesa, a concelleira Mariela Aguilar. Gumersindo Galego, coa sentenza na man, carga duramente contra Aguilar acusándoa de actuar "en complot" con Participación Democrática Directa de Galicia e acusando aos representantes do BNG de "cometer ilegalidades", entre elas a de "prevaricación". Consideramos que se trata de acusacións moi graves e infundadas que o PP, segundo Galego, está disposto a levar aos tribunais "incluso pola vía penal". Animámolo a que o faga; tanto Mariela Aguilar como o resto de compoñentes do Grupo Municipal do BNG temos a conciencia moi tranquila, posto que actuamos antepoñendo sempre o interese xeral e o da institución a calquera desexo de manter o goberno, nun momento en que non existía seguridade xurídica firme sobre ningún dos argumentos defendidos polo PP, Bastida e Castro para respaldar o seu asalto ao poder en Fene.

Por último, tamén queremos comentar que, segundo asegurou Gumersindo Galego  nos micrófonos de Radio Fene a semana pasada, o Concello terá que pagar "cos cartos de todos os veciños" as costas xudiciais de ambos procedementos, laiándose de que Somos Fene e o PP tivesen que custearse os seus avogados. Bastida cifra seguidamente en 1.000 euros a contía económica que, supostamente, terá que pagar o Concello por apelar contra a sentenza do Contencioso que suspendeu cautelarmente a súa consideración como non adscritos. Cómpre precisar este dato, indicando que as costas se impoñen aos apelantes: Concello de Fene, Participación Democrática Directa de Galicia e María del Carmen Martínez (representante de Esquerda Unida) e que, polo tanto, o custe total debe ser asumido polas tres partes e non unicamente polo Concello. Ademais, tamén hai que lembrar que a imposición de costas servirá para sufragar a minuta dos avogados de Somos Fene e, no seu caso, tamén dos do PP.

En calquera caso, a xustiza pronunciouse, aínda que non dixese a súa última palabra. Desde o BNG de Fene insistimos en respectar as decisións xudiciais malia non compartilas, precisamente, por caber aínda posibilidade de recurso no tocante á sentenza do Contencioso e de recurso de casación no caso da sentenza do TSXG.

Digna Faraldo 

Responábel local do BNG en Fene

PP-Somos Fene rexeitan as alegacións da CIG ao orzamento sen dialogo algún

A intolerancia faise dona do bipartito fenés. Na mañá de hoxe, martes 18 de setembro, o alcalde convocou un Pleno  urxente para rexeitar as alegacións da CIG ao orzamento 2019. 

A convocatoria fíxose con total escurantismo, sen comentar previamente coa oposición o día e a hora. As alegacións tiñan un mes para ser aceptadas ou rexeitadas e o goberno local adiou o acordo ata a última semana, creando a urxencia pola súa incompetencia. Coa maioría absoluta garantida os Populares podían ter falado á representación laboral e convocado unha Comisión informativa para dar conta dos informes e propostas. En lugar disto optaron polo recurso da urxencia, que non existe, e do escurantismo e a intolerancia. 

Como lexítimos representantes do pobo de Fene, toda a corporación, ten dereito a ter  a documentación dos asuntos en prazo para poder  avaliar os mesmos e fixar posición. O goberno PP- Somos Fene  fai de novo un exercicio de prepotencia e de falla de respeito á oposición ocultando os asuntos ata 24 horas antes da sesión plenaria.

O diálogo e a  paz social teñen que ser a bandeira das relacións laborais no Concello, e a negociación do Capítulo I de persoal, así como das ofertas de emprego son obrigatorias, aínda tendo o goberno a última palabra, a negociación non se pode furtar como foi neste caso.

O Grupo municipal do BNG rexeita as formas e o fondo da actuación deste goberno  escurantista e intransixente e demanda unha relación dialogada e transparente.

Lembrando a Pancho

Como cada 4 de setembro dende o BNG de Fene non queremos deixar que acabe este día sen facer unha lembranza do noso compañeiro Pancho Allegue, que falecía tal noite coma hoxe en 2005 dun paro cardíaco con só 46 anos de idade.

Sindicalista, traballador e defensor incansable do noso sector naval e concelleiro nacionalista de Fene durante 18 anos seguidos, será sempre un referente e un exemplo a seguir para todas e todos nós. O seu legado de traballo incansable, de proximidade co pobo e, sobre todo, de limpeza e honestidade, segue moi presente entre os compañeiros e compañeiras do Bloque de Fene.

Alá onde esteas, moitas grazas.