Propostas do BNG de Fene para as obras do POS 2019

Posto que nos últimos meses nunca fomos convocados polo alcalde nin por concelleir@s do goberno para tratar as obras a executar no próximo POS 2019, hoxe o Grupo Municipal do BNG presentou no concello diversas propostas logo de ter mantidas reunións coa veciñanza e distintas asociacións. Unha parte das obras relacionadas xa teñen proxectos e outras os trámites realizados.

Ligazón ao album de Facebook: aquí

Actividade para conmemorar o 25N

COMUNICADO DO CONSELLO LOCAL DO BNG DE FENE

Hai unha semana, o alcalde e líder do PP local, Gumersindo Galego, e Xoán Manuel Rodríguez Bastida, de Somos Fene, fixeron varias declaracións aos medios referidas a dúas sentenzas recibidas polo Concello en relación cos procedementos que se viñeron seguindo nos últimos meses para aclarar a pertenza ou non dos edís de Somos Fene ao grupo dos non adscritos e tamén para pronunciarse sobre a suspensión do pleno de moción de censura do mes de outubro por parte da presidenta da Mesa de Idade.

Antes de facer ningún comentario ao respecto, o Grupo Municipal do BNG quixo coñecer de primeira man o contido exacto de ambas sentenzas. Por ese motivo solicitámoslle formalmente á alcaldía que se nos facilitase copia das dúas resolucións, máis aínda cando o propio Gumersindo Galego anunciou na súa comparecencia ante os medios que as sentenzas estarían dispoñibles para toda a veciñanza de Fene. 

Porén, os días pasan e, igual que ocorre con outra información solicitada ao novo executivo PP-Somos Fene, só obtemos o silencio por resposta, negándosenos por omisión o acceso a información que temos dereito a recibir e que, curiosamente, si se lles traslada aos medios de comunicación (as sentenzas están na web de Radio Fene). Nada novo, tendo en conta o período de escurantismo no que entrou Fene tralo asalto ao poder dos populares e os seus socios da Marea o pasado 6 de abril.

Deste modo, a única referencia ao contido dos ditames xudiciais da que dispoñemos son as palabras de Galego e Bastida recollidas por Radio Fene a semana pasada, nas que fan varias afirmacións que deben ser respostadas pola nosa banda ante as numerosas imprecisións que conteñen e as graves acusacións que se dirixen a membros deste grupo municipal.

Na intervención gravada, Rodríguez Bastida relata de viva voz parte do texto da sentenza do Tribunal Superior de Xustiza de Galicia na que este órgano viría ratificar a súa pertenza ao Grupo Municipal Somos Fene.  Como se lembrará, o PDDG -partido polo que Bastida e César Castro concorreron as municipais- revogoulles a representatividade trala primeira tentativa de moción de censura, aló polo mes de xuño de 2017. A raíz da expulsión dos dous edís do seu partido matriz, que en ningún momento supuxo a perda das súas actas como concelleiros, deuse conta no pleno de agosto dese ano do seu paso ao grupo dos non adscritos. Esta medida adoptouse por unha resolución da alcaldía seguindo informes técnicos da Secretaría municipal -en aplicación da interpretación técnica da normativa electoral e a xurisprudencia existente-, non por unha decisión arbitraria e unilateral de Juventino Trigo nin do goberno do BNG como quere facer ver o representante de Somos Fene na súa intervención ante os medios.  

A resolución  foi recorrida no xulgado por Bastida e Castro e, finalmente, foi suspendida cautelarmente polo Contencioso Administrativo nº 1 de Ferrol. Ante esta situación, a Deputación da Coruña a instancias do Concello -non o BNG nin Juventino Trigo a título persoal-, Esquerda Unida e Participación Democrática Directa de Galicia acudiron ao Tribunal Superior de Xustiza de Galicia para que se pronunciase sobre se Xoán Manuel Rodríguez e César Castro debían ser considerados ou non Grupo Municipal Somos Fene. Agora -sete meses despois de que a moción prosperase- o tribunal seica confirma a conformación do grupo cunha sentenza que é recorrible ante o Supremo, aínda que intuímos que o Concello non vai dar ese paso malia que o seu deber como institución sería esgotar a vía xurídica. Respectamos as sentenzas, aínda que non as compartamos por entender neste caso que si se vulnerou a normativa electoral e, sobre todo, porque o mantemento do grupo para Somos Fene sen que mediase sentenza firme significou a cadratura numérica coa que se perpetrou un asalto ao poder e unha traición ao electorado por parte de quen viñan para "mudalo todo". 

O Concello, como institución situada por riba das persoas que están gobernando, abandeirou daquela a defensa da legalidade. Unha defensa que tería que continuar ata o remate do seu percorrido por dúas razóns: despexar calquera tipo de dúbida legal e despexar calquera tipo de dúbida sobre o compromiso dos actuais gobernantes coa institución. Non vai ser así, xa vimos non hai moito tempo como o bipartito PP-Somos Fene botaba terra sobre o asunto das farolas deixando correr os prazos de recurso. O PP conseguiu tapar con argucias procedimentais as súas propias miserias, sen importarlle o máis mínimo a mancha que lle queda á institución nin as incógnitas que deberían ser resoltas por respecto á veciñanza.  

A intervención de Xoán Manuel Rodríguez Bastida diante dos micrófonos radiofónicos para explicar o contido da sentenza estivo secundada polo seu socio, Gumersindo Galego, quen cualifica a actuación do Concello ao apelar perante o TSXG como "un atropelo" dos dereitos dos edís de Somos Fene. O líder do PP suxire que ese foi un dos motivos para presentar a moción de censura, obviando na súa intervención que a primeira tentativa de rexistrala -en xuño de 2017- se produciu antes de que Bastida e Castro fosen expulsados do partido instrumental PDDG.  Gumersindo Galego defende que a moción foi adiante no momento en que estes concelleiros "tiñan devoltos os seus dereitos", pasando por alto tamén que daquela -e aínda hoxe- non existía sentenza firme sobre a súa condición de non adscritos.

Porén, o motivo dos comentarios do actual alcalde popular non vén ao caso da situación de Somos Fene, senón doutra sentenza do Contencioso Administrativo nº1 de Ferrol a raíz da denuncia do PP contra a decisión da Mesa de Idade de suspender o pleno de finais de outubro de 2017 en que se ía debater por primeira vez a moción de censura. De novo temos unha sentenza que respectamos, aínda considerando que vai en contra do interese xeral ao xulgar que a sesión debería ter continuado en vez de ser levantada co voto de calidade da presidenta da Mesa, a concelleira Mariela Aguilar. Gumersindo Galego, coa sentenza na man, carga duramente contra Aguilar acusándoa de actuar "en complot" con Participación Democrática Directa de Galicia e acusando aos representantes do BNG de "cometer ilegalidades", entre elas a de "prevaricación". Consideramos que se trata de acusacións moi graves e infundadas que o PP, segundo Galego, está disposto a levar aos tribunais "incluso pola vía penal". Animámolo a que o faga; tanto Mariela Aguilar como o resto de compoñentes do Grupo Municipal do BNG temos a conciencia moi tranquila, posto que actuamos antepoñendo sempre o interese xeral e o da institución a calquera desexo de manter o goberno, nun momento en que non existía seguridade xurídica firme sobre ningún dos argumentos defendidos polo PP, Bastida e Castro para respaldar o seu asalto ao poder en Fene.

Por último, tamén queremos comentar que, segundo asegurou Gumersindo Galego  nos micrófonos de Radio Fene a semana pasada, o Concello terá que pagar "cos cartos de todos os veciños" as costas xudiciais de ambos procedementos, laiándose de que Somos Fene e o PP tivesen que custearse os seus avogados. Bastida cifra seguidamente en 1.000 euros a contía económica que, supostamente, terá que pagar o Concello por apelar contra a sentenza do Contencioso que suspendeu cautelarmente a súa consideración como non adscritos. Cómpre precisar este dato, indicando que as costas se impoñen aos apelantes: Concello de Fene, Participación Democrática Directa de Galicia e María del Carmen Martínez (representante de Esquerda Unida) e que, polo tanto, o custe total debe ser asumido polas tres partes e non unicamente polo Concello. Ademais, tamén hai que lembrar que a imposición de costas servirá para sufragar a minuta dos avogados de Somos Fene e, no seu caso, tamén dos do PP.

En calquera caso, a xustiza pronunciouse, aínda que non dixese a súa última palabra. Desde o BNG de Fene insistimos en respectar as decisións xudiciais malia non compartilas, precisamente, por caber aínda posibilidade de recurso no tocante á sentenza do Contencioso e de recurso de casación no caso da sentenza do TSXG.

Digna Faraldo 

Responábel local do BNG en Fene

PP-Somos Fene rexeitan as alegacións da CIG ao orzamento sen dialogo algún

A intolerancia faise dona do bipartito fenés. Na mañá de hoxe, martes 18 de setembro, o alcalde convocou un Pleno  urxente para rexeitar as alegacións da CIG ao orzamento 2019. 

A convocatoria fíxose con total escurantismo, sen comentar previamente coa oposición o día e a hora. As alegacións tiñan un mes para ser aceptadas ou rexeitadas e o goberno local adiou o acordo ata a última semana, creando a urxencia pola súa incompetencia. Coa maioría absoluta garantida os Populares podían ter falado á representación laboral e convocado unha Comisión informativa para dar conta dos informes e propostas. En lugar disto optaron polo recurso da urxencia, que non existe, e do escurantismo e a intolerancia. 

Como lexítimos representantes do pobo de Fene, toda a corporación, ten dereito a ter  a documentación dos asuntos en prazo para poder  avaliar os mesmos e fixar posición. O goberno PP- Somos Fene  fai de novo un exercicio de prepotencia e de falla de respeito á oposición ocultando os asuntos ata 24 horas antes da sesión plenaria.

O diálogo e a  paz social teñen que ser a bandeira das relacións laborais no Concello, e a negociación do Capítulo I de persoal, así como das ofertas de emprego son obrigatorias, aínda tendo o goberno a última palabra, a negociación non se pode furtar como foi neste caso.

O Grupo municipal do BNG rexeita as formas e o fondo da actuación deste goberno  escurantista e intransixente e demanda unha relación dialogada e transparente.

Lembrando a Pancho

Como cada 4 de setembro dende o BNG de Fene non queremos deixar que acabe este día sen facer unha lembranza do noso compañeiro Pancho Allegue, que falecía tal noite coma hoxe en 2005 dun paro cardíaco con só 46 anos de idade.

Sindicalista, traballador e defensor incansable do noso sector naval e concelleiro nacionalista de Fene durante 18 anos seguidos, será sempre un referente e un exemplo a seguir para todas e todos nós. O seu legado de traballo incansable, de proximidade co pobo e, sobre todo, de limpeza e honestidade, segue moi presente entre os compañeiros e compañeiras do Bloque de Fene.

Alá onde esteas, moitas grazas.

O Alcalde de Fene despilfarra 2.900€ nunha explanada sobre a que había unha obra prevista dende o ano pasado

Foi a finais do mes de maio cando Gumersindo Galego anunciaba o arranxo da explanada anexa ao paseo de San Valentín por un importe de 2.900€. Os traballos consistiron no alisado da superficie mediante unha retroexcavadora e un pisón.

Menos de dous meses despois o mesmo Concello de Fene inicia unha obra prevista dende 2017 sobre ese espazo arranxado.

Para o BNG existe unha falla de coordinación entre a Concellaría de Obras  e a de Servizos, por non falar da nula capacidade do alcalde do PP en saber o que hai que facer e que está pendente.

A obra que se está a facer de separación de fecais e pluviais resulta ser a consecuencia da neglixencia do PP no seguimento das obras da EDAR que se realizaron hai 4 anos. O actual alcalde pasou de todo como nel é normal e foi durante o goberno do nacionalista Juventino Trigo cando houbo que xestionar a eliminación destas augas residuais.

Outro exemplo de ausencia de coordinación e despilfarro foi o pintado de pasos de peóns no mesmo barrio de San Valentín hai un mes e que agora se levantan coas obras de saneamento.

O ALCALDE DE FENE MENOSPREZA ÁS ARTISTAS CONTRATADAS POLO CONCELLO

Gumersindo Galego, nunhas declaracións a un medio de comunicación, cualifica as actividades programadas para o ciclo do Día da Patria Galega de “actividades para minorías, sen interese cultural nin para Fene, nin para a comarca”

Galego Feal, que na súa anterior etapa á fronte da alcaldía xa exerceu como censor, vetando unha exposición de Davila no Museo do Humor, exposición que logo recuperaría o goberno do BNG con grande éxito de público, e da súa falla de respecto pola creación artística, intentando chantar unha fotografía de El Rei na instalación de Patricia Dopico que preside o salón de plenos, intento abortado polo pleno da corporación municipal, volve á carga descualificando as actividades programadas para o ciclo do “Día da Patria Galega”.

Só quen despreza canto ignora é quen de se referir aos espectáculos de Circo Chosco; Ith; corais de San Valentín, Maniños, Sillobre e Eterna Xuventude; Tradicoro; rondallas Estrelecer e Perla do Río; Nautilus Band ou Ses como “para minorías” ou “carentes de interese cultural”.

Dende o BNG queremos transmitirlle ás artistas contratadas o noso público recoñecemento polo seu labor creativo ao tempo que instamos ao alcalde de Fene a rectificar as súas declaracións, pedíndolle desculpas públicas a todas elas.

Recomendámoslle ao alcalde de Fene que en lugar de proferir ex-abruptos asuma as súas responsabilidades e recoñeza publicamente os erros cometidos polo seu goberno coa máis que tardía e deficiente publicidade do ciclo do Día da Patria Galega.

Ao mesmo tempo, queremos agradecerlle á veciñanza que, malia á pésima publicidade, acudiu estes días á Praza do alcalde Ramón Souto González, constatando en vivo e en directo a calidade dos espectáculos contratados. Ao tempo, facemos un chamamento a veciños e veciñas a abarrotar o vindeiro venres, 13 de xullo, o parque lineal do Río Cádavo, na lectura da declaración institucional, e a Praza Ramón Souto González no concerto de Ses co que remata o ciclo do “Día da Patria Galega”.

Acto público con Ana Pontón en Fene

O pasado 6 de Abril consumouse a alianza entre o PP e "Somos Fene" para desbancar do goberno municipal de Fene ao lexítimo goberno do BNG; nun noxento acordo que está en realidade máis vinculado a intereses que teñen a ver pouco cos intereses da veciñanza e moito con outros do ámbito persoal e particular das organizacións e persoas promotoras deste esperpento.

Ao marxe da aclaración necesaria ao conxunto da cidadanía de todo o relacionado con este asumto, a nosa organización entende que é preciso trasladar tamén ao conxunto da sociedade un compromiso que reafirme ao BNG na capacidade e na necesidade de continuar no proxecto ilusionante e transformador que o BNG comezara, nunha nova etapa, hai agora tres anos. 

Nesa liña, imos celebrar un primeiro acto aberto á cidadanía; que vai celebrarse o vindeiro venres dia 11 de Maio ás 19,30 h. na "Praza da Escola" en Perlío-Fene, e no que intervirán a portavoz nacional, Ana Pontón, e o compañeiro Juventino Trigo.

A ASEMBLEA LOCAL DO BNG DE FENE ESIXE A DIMISIÓN DO PORTAVOZ SOCIALISTA NO CONCELLO

Chove sobre mollado. No Pleno do Concello de Fene do pasado xoves 3 de maio, o voceiro socialista Antón Noceda repetiu o seu espectáculo de persecución de traballadores pola súa orientación sindical e política. Un concelleiro que entrou na corporación no ano 2007 e que entre as súas teimas está a persecuión ideolóxica dos traballadores e traballadoras do concello de Fene. Este concelleiro dedícase con especial sectarismo e inquina a facer listaxes de traballadores “afíns e non afíns”, e a enviar correos electrónicos directamente a empregados e concelleiros poñendo en dúbida o labor de moito persoal municipal, sempre vinculado á posición ideolóxica e incluso á relación familiar de cada quen.

O concelleiro en cuestión estalle a facer o traballo suxo ao PP sendo un mamporreiro que acumula todo o seu desprestixio persoal e político na corporación, usando o insulto persoal e a descalificación como dialéctica habitual. Nos últimos anos, a súa ira e misoxínia foi contra a concelleira nacionalista Sandra Permui e o actual presidente do Comité de empresa.
Por todo isto, a Asemblea local nacionalista esixe a dimisión do portavoz socialista Antón Noceda. Todo indica que a dimisión á que se veu forzado en 2009, pola presión dos traballadores ao por aquel entón alcalde socialista Iván Puentes, non valeu para que reflexionara e variara a súa actitude cargada de manías persecutorias e paranoias actuando, antes e agora, con moi mala fe.
Antón Noceda pon o colofón á deriva do Partido socialista no concello, asinando unha moción de censura hai un ano e promovendo as dúas seguintes, xuntando interese e miserias de populares e tránsfugas da Marea de Fene.

A nivel institucional, o portavoz nacionalista Juventino Trigo advirte ao alcalde censor que debe impedir que os delirios e a persecución continúen, do contrario tomaranse as medidas máis efectivas para cada caso.

A nivel político, a Asemblea local do BNG de Fene trasladará a esixencia de dimisión do portavoz socialista á dirección galega do PSdeG-PSOE a través das canles orgánicas.

O BNG LAMENTA O ESPECTÁCULO DO PRIMEIRO PLENO DO GOBERNO DO PP-SOMOS FENE

Cun Pleno urxente  o novo bipartito de Fene impón ata os horarios e os días das Comisións Informativas, algo inaudito nos case  40 anos de concellos democráticos. O fondo e a forma dos asuntos a tratar era evidente que traerían un intenso debate entre os censores PP-Somos Fene, e o concelleiros do goberno saínte BNG-IU. 

O que non agardábamos no BNG era a mala educación, machista e desagradable do portavoz de Somos Fene que  logo dunha intervención da portavoz do Grupo mixto e concelleira de IU,despachouse cun "me la suda" 

Pois neste Pleno onde se aprobaron as dedicacións exclusivas, as horas e os días das comisións máis os representantes do Concello en diferentes órganos o Alcalde censor lonxe de ordenar o debate riulle a mala educación e as faltas de respeito ao seu socio, o portavoz transfuga de Somos Fene. Os papeis están ben definidos, os transfugas fanlle o traballo suxo ao PP dando estopa sen a máis mínima educación e os populares rinlle as grazas.  

Quedan 14 meses de dura oposión, control e seguiento do novo goberno, por parte do BNG,  que conta con maioría absoluta e no que xa se ve a faciana du PP  intolerante e trapalleiro.

O NOVO ALCALDE DE FENE CONVOCA UN PLENO URXENTE PARA REPARTIR AS DEDICACIÓNS EXCLUSIVAS

Cobrará o dobre que Juventino Trigo e paga o apoio de Somos Fene cun salario para César Castro

Unha semana despois da moción de censura de Fene, o alcalde censor, Gumersindo Galego, convoca un Pleno extraordinario e urxente para este luns ás 9 da mañá co obxectivo de repartise as dúas dedicacións exclusivas dipoñibles. Os preto de 41.500 euros brutos anuais (41.405,85 exactamente) que Juventino Trigo repartía entre parte do seu equipo de goberno (20.701 para el e 10.352 para Sandra Permuy e Justo Martínez Ardá) serán percibidos agora en exclusiva polo alcalde censor, Gumersindo Galego, que non asume ningunha competencia máis alá da coordinación do goberno, mentres que Trigo era tamén o responsable da área de Facenda, Patrimonio e Promoción Económica. A segunda dedicación exclusiva, que co anterior goberno non se adxudicou a ninguén, vai agora para o concelleiro tránsfuga de Somos Fene, César Castro, que pasa cobrar así os favores realizados.

Acláranse así os motivos da rocambolesca moción de censura que prosperou en Fene o pasado 06 de abril por orde xudicial despois de que, en agosto de 2016, o BNG explusara do goberno a Somos Fene e ao PSOE por poñer os seus intereses persoais por enriba do servizo á cidadanía. Máis alá do sobre custo do goberno censor, a demanda da dedicación exclusiva no último minuto para César Castro foi unha das razóns que fixo saltar polos aires o acordo tripartito en agosto de 2016. Naqueles días vivimos o paradoxo de que o PSOE non usaba a dedicación exclusiva que tiña de 27.701€ e ao tempo impedía que o concelleiro de Somos Fene tivese unha. 

Nin o BNG, nin o alcalde Juventino Trigo, podía encabezar un goberno no que os intereses persoais estivesen por enriba do servizo público. No BNG apostamos por unha compensación lóxica aos cargos públicos, pero en ningún caso imos antepoñer as asigancións económicas á nosa acción política. Nós non participamos nas institucións para resolver as situacións persoais dos cargos electos.

A forma de convocar, pola vía da urxencia e sen falar coa oposición, cal vai ser a liña democrática destes próximos 13 meses. O portavoz nacionalista, Juventino Trigo, afirma que "en  Fene rematou a transparencia."

O BNG de Fene convoca Asemblea local aberta

O BNG de Fene chama aos seus militantes e simpatizantes a participar na vindeira Asemblea Local aberta, que terá lugar mañá venres 13 de abril ás 20.00 na sede nacionalista na avenida Naturais 41-43 baixo traseira. Nesta xuntanza avaliarase a situación política actual e os pasos a seguir de cara ás vindeiras eleccións municipais. A Asemblea local será aberta a todas as persoas simpatizantes e militantes e tratará de recoller todas as opinións e propostas de actuación para ter o máximo acordo e acadar unha proposta política gañadora.

Ademais de dar conta polo miúdo das diferentes frontes xudiciais abertas e das súas polibles consecuencias, os nacionalistas definirán a súa estratexia de oposición municipal, como auditores dos pasos do goberno censor.

Nun segundo punto trataranse as liñas xerais das municipais 2019, coa constitución de dúas comisións executivas, para a elaboración dunha proposta de candidatura e a redacción dun programa político.

O Consello Local  agradece o apoio amosado nas últimas datas ao Alcalde Juventino Trigo e, por extensión, ao seu goberno, e dará conta na asemblea de todos os apoios e mostras de solidariedade recibidas.

Actividade do BNG de Fene polo Día da Muller

Como cada ano o BNG de Fene conmemorará o Día Internacional da Muller cunha actividade que cada ano tentamos que sexa diferente, esta é a nosa proposta para este ano. Animádevos! As prazas son limitadas e será necesario comunicárnolo no correo fene@bng.gal

O PP VIVE DAS TROLAS AO ESTILO DE DONALD TRUMP

A última “nova” difundida polos populares de Fene é propia da pluma de Calleja ou Green, un conto. 

Afirmar que a rotonda de San valentín está abandonada non resiste a evidencia, ou dicir que o paseo marítimo está descoidado, só responte aos paus de cego de quen de súpeto quere facer oposición a base de notas de prensa. Sá hai que pasear pola zona para ver que está en bo estado de conservación e que o goberno local actúa, como fixo coa última instalación de alumeado na parte que conecta o Polideportivo da Xunqueira co anfiteatro, o paseo marítimo e a Avenida do mar.

A única evidencia que existe é que Fene funciona, os servizos básicos competencia do Concello realizanse día a día e os proxectos novos están nas mans da maioría do Pleno. No caso do barrio de San Valentín os tres grupos da oposición ( PP, PSOE e Somos Fene) negáronse a aprobar un proxecto de máis de 200.000 € para construir unha zona de lecer nos prados existentes na contorna da praia de San Valentín, obras que consisten no drenado, axardinamento, dotación de zonas recreativas con mesas e barbacoas ademais dunha zona de esparcemento canina. Este proxecto responde a unha demanda do Centro de Promoción social de San Valentín.

No BNG vemos con sorpresa como o PP é incapaz de facer unha soa proposta constructiva, sendo a súa actuación impropia, de que se di forza de goberno, actuando como trileros coa xudicialización da políticia local, o matonismo e a mentira.

Rotonda de San Valentín