Acto sobre "A muller traballadora"

O BNG de Fene convída a todo o mundo que o desexe este venres 15 de marzo ás 19:15 horas ao acto para conmemorar o Día Internacional da Muller do pasado día 8.

Será no noso local en Fene e consistirá na proxección do filme "En tierra de hombres" (North country), un pequeno coloquio e remataremos cuns pinchos.

Información sobre a película:

Dirección: Niki Caro.
País: USA.
Ano: 2005.
Duración: 126 min.
Xénero: Drama.
Interpretación: Charlize Theron (Josey Aimes), Frances McDormand (Glory), Sean Bean (Kyle), Richard Jenkins (Hank), Jeremy Renner (Bobby), Michelle Monaghan (Sherry), Woody Harrelson (Bill White), Sissy Spacek (Alice), Elle Peterson (Karen Aimes), Thomas Curtis (Sammy Aimes), James Cada (Don Pearson), Rusty Schwimmer (Betty).

SINOPSE

Cando fracasa o seu matrimonio, Josey Aimes (Charlize Theron) volta á sua vila natal no norte de Minnesota na busca dun bo traballo. Nai solteira con dous nenos ao seu cargo, busca traballo na fonte principal de emprego da rexión: as minas de ferro. O traballo é duro pero está ben pagado e as amizades que se forman alí espállanse á vida cotiá, xuntando familias e veciños nun fío común. É unha industria dominada polos homes desde sempre, nun lugar pouco afeito aos cambios. Animada pola súa vella amiga Glory (Frances McDormand), unha das poucas mulleres mineiras na vila, Josey únese a aqueles traballadores que furan na pedra para sacar o mineral na canteira. Está mentalizada para o perigoso e duro traballo pero non para soportar o acoso que ela e as outras mineiras sofren por parte dos seus compañeiros, o cal é unha proba moito máis dura. O último que queren os mineiros é ter que competir con mulleres para os poucos empregos que hai, mulleres que según eles non deberían estar a conducir camións nin arrastrando pedras. Cando Josey protesta contra o trato que ela e as súas compañeiras reciben, atopa unha grande oposición. Non só os que mandan non queren escoitar a verdade, tampouco outros membros da comunidade como os seus pais e moitas das súas propias compañeiras que teñen medo de que faga que a situación vaia de mal en peor. As consecuencias da loita de Josey para conseguir unha vida mellor para sí e os seus fillos afectarán a todos os aspectos da súa vida, incluso as relacións coa filla máis nova e o seu fillo adolescente. A través destes contratempos, Josey atopará o valor para loitar polo que cre, a pesar de ter que facelo soa. Inspirada nunha historia real, "En tierra de hombres" sigue a viaxe de Josey por un camiño que a levará máis lonxe do que nunca imaxinara, inspirando a moitos outros, e acabando no primeiro pleito masivo contra o acoso sexual.

 OLLA O TRAILER

O PP DE FENE INCAPAZ DE EXPLICAR A FACTURACIÓN DE EULEN NA EXECUCIÓN DO CONTRATO DESDE XUÑO DE 2012

No  Pleno ordinario, celebrado o xoves 7 de marzo,  compareceu a petición do BNG a Concelleira de Cultura e Deportes, a popular Rocío Bértoa, para dar explicacións sobre a facturación de varias empresas principalmente a relacionada coa contratación desde xuño cos servizos de limpeza mantemento e conserxería das instalacións deportivas.

O GM do BNG levaba meses preguntando pola facturación deste servizo contratado por 171.000 que logo se incrementou pola subida do IVE en 3000 € máis. En seis meses, quedou probado, que o goberno gastou máis de 30.000 € dos inicialmente previstos. Tamén quedou claro que non foron quen de explicar en que se gastaron estes cartos a maiores. Os conceptos nas facturas son os mesmos reiteradamente, sen detalle algún de que se fixo diferente ou a maiores. 

Na súa comparecencia a concelleira mentiu, evitou contestar ou o fixo con evasivas ate rematar recoñecendo erros e a asunción da responsabilidade de telo feito mal.  O goberno do PP pagou varias veces  o mesmo servizo cos informes desfavorables da Intervención municipal.

Para os nacionalistas de Fene estas escusas non son válidas, xa que desde o minuto  un advertimos de falta de dilixencia e de erros evidentes na  vixilancia  do cumprimento  do servizo asumida directamente pola concelleira. Para o portavoz do BNG no concello Manuel Polo “quedou demostrado o descontrol na xestión da área polo que lle pedimos ao alcalde que releve á concelleira destas funcións”. Ao tempo o BNG de Fene queremos un concello transparente onde se responda con axilidade e claridade.

O BNG DE FENE PRESENTA UNHA MOCIÓN SOBRE OS CUSTES DAS PEAXES NA AP9

O Pleno ordinario do concello de Fene, deste vindeiro xoves 7 de marzo, debaterá unha moción sobre os custes da autoestrada Fene-Coruña. Esta iniciativa ven motivada polas continuas subidas no custe da peaxe agudizándose desde o pasado 1 de xaneiro coa entraba en vigor, logo da autorización feita polo Ministerio de Fomento a finais de ano, dunha nova subida na peaxe da A9.

Para o BNG 4 subidas en 12 meses son inasumíbeis na práctica pola meirande parte da sociedade, xa que o custo do traxecto entre A Coruña e Vigo supera os 15 euros, mentres que o traxecto entre Ferrol e a fronteira de Tui –o percorrido completo da A9- achégase na práctica aos 20 euros.

Estamos a falar, pois, dunha das autoestradas máis caras do Estado e que, como se ten posto de manifesto en numerosas ocasións, leva o engadido do feito de non contar cun Programa de Descontos, a semellanza do que acontece noutras autoestradas do Estado. Os constantes incrementos dos prezos das peaxes – reiteramos que foron catro o pasado ano – nun contexto de grave crise económica, levan irremediabelmente á redución de usuarios da autoestrada. En troques, a utilización das estradas alternativas – nun estado deteriorado - levan a atascos e colapsos, ao non poder absorber o tráfico.

A incidencia desta situación – para o conxunto da poboación pero, nomeadamente, para os transportistas - na nosa comarca é maior aínda, xa que ao agravamento da crise e maior desemprego - co progresivo deterioro económico que leva consigo – hai que engadir o feito de non contarmos con vías alternativas en condicións. Por outra banda, os tramos de Miño a Cabanas e de Cabanas a Fene – que poderían actuar como alivio aos atascos que se producen na estrada convencional – resultan dos máis caros con relación á súa lonxitude.

A vista dos feitos expostos, desde o BNG entendemos que os concellos da comarca deberan de fixar unha estratexia común na defensa do conxunto das veciñas e veciños, para o que propomos a adopción dos seguintes acordos;

1.- Manifestar o rexeitamento da corporación á recente suba das peaxes na A9, polo impacto negativo que representa na xa deteriorada economía da comarca.

2.- Esixir do Ministerio de Fomento a urxente revisión da política de peaxes, que camiñe na dirección de rebaixar os custes das mesmas; nomeadamente na actual situación de grave crise.

3.- Solicitar a supresión da peaxe no tramo da A9 que vai de Miño a Fene.

4.- Demandar a urxente construción dun novo enlace da A9 no Polígono do Vidrieiro-Pontedeume.

O BNG DE FENE SOLICITA UN PLENO EXTRAORDINARIO PARA DEBATER A SÚA PROPOSTA POLO EMPREGO E A REACTIVACIÓN ECONÓMICA NO CONCELLO

O pasado 21 de febreiro os nacionalistas de Fene rexistraron unha petición de pleno extraordinario para debater e se procede aprobar a PROPOSTA DO BNG POLO EMPREGO E POLA REACTIVACIÓN ECONÓMICA DE FENE.

Agora o Alcalde ten 15 días hábiles para por a data do Pleno, o último día posíbel será o vinderio 11 de marzo. Para o BNG é moi importante que se dea este debate debido á falta de iniciativa do goberno do PP. 

O BNG realizou esta proposta de combate contra o desemprego e pola reactivación económica vinculada á elaboración dos orzamentos municipais de 2013,  o pasado 10 de xaneiro.  Visto a incapacidade do alcalde popular Gumersindo  Galego  en dar pasos concretos.

No BNG propomos as seguintes mediadas como punto de partida:

Creación dun Plan especial de emprego de 3 anos de duración dotado con, como mínimo, 500.000€ para a contratación de persoal de limpeza para edificios municipais, peonaxe de servizos, obras, xardinería e auxiliares de axuda no fogar, e outros que se valoren necesarios. Este Plan estaría convocado publicamente  a través dunhas bases mixtas de capacitación profesional e criterios sociais. 

O  Plan terá unha comisión de elaboración e seguimento conformada por persoal técnico municipal da área de emprego e servizos sociais, unha representación sindical e da unha representación de cada grupo político da corporación. O obxectivo do Plan será xerar entre 35 e 50 contratos anuais dunha duración  mínima de 3 meses e sempre inferiores a un ano,  en función dos servizos a realizar.

Creación dun Plan Fiscal para reformular taxas e impostos na liña de avanzar nas bonificacións parciais ou exencións de taxas e impostos a persoas con menos recursos  cando menos en todos os servizos esenciais, auga, saneamento, recollida do lixo, crear bonificacións para Pemes e autónomos nas taxas e impostos que sexa viábel nun período de 3 anos. Como mínimo 100.000 € anuais, revisar o imposto de transmisións facendo exentos do mesmo ás rendas máis baixas, reducir o ICIO durante 3 anos tanto a particulares como empresas, posibilitar o fraccionamento dos pagos das taxas e impostos ao longo do exercicio fiscal, revisión de padróns de contribuíntes, especialmente os vinculados a inmobles desocupados, revisión do conxunto da fiscalidade (IBI  e IAE) a Navantia Fene e ás súas instalacións anexas.

Os acordos que propomos ao Pleno da corporación son os seguintes:

1.- Convocar, no prazo de 15 días, unha Comisión especial  constituída  por un representante de cada GM, un representante de cada organización sindical con representación no concello e un técnico/a da área de formación e emprego, unha técnica de servizos sociais e presidida polo alcalde ou concelleiro/a en quen delegue.

2.- Cumprido o apartado anterior, redactar por parte da Comisión especial un Plan de emprego municipal no que se recolla, cando menos, o contexto socioeconómico, o alcance temporal, os obxectivos do mesmo, e a metodoloxía de selección do persoal.

3.-Convocar, no prazo dun mes,  unha Comisión mixta de Facenda e Benestar social asistido polo persoal técnico de ambas áreas co obxectivo de facer propostas de modificación das ordenanzas fiscais nos aspectos das exencións totais ou parciais das diferentes taxas e impostos á persoas con menos recursos.

4.-Convocar, no prazo dun mes, a Comisión de promoción económica e facenda para realizar un Plan fiscal de apoio ás PEMES do concello adoptando medidas de rebaixa de taxas e impostos.

5.-Dar conta do acordo ás Federacións de administración pública dos sindicatos máis representativos (CIG, CCOO, UGT e CSIF), ao Comité de empresa e xunta de persoal  do Concello de Fene, ás entidades IEN por Europa, Asociación de Comerciantes  O Cruceiro, e ás entidades asociativas do Concello de Fene.

 

 

 

O BNG esixe ao PP solucións aos problemas dos equipamentos públicos de Sillobre

O BNG de Fene recibiu queixas das diferentes  entidades  veciñais de Sillobre polo deficiente estado de equipamentos básicos como son o patio da escola e os xogos  infantís do mesmo, os cortes de enerxía eléctrica no local social de titularidade municipal ou o mal estado dos xogos infantís situados no parque do Souto.

 

Para o BNG resulta preocupante que equipamentos como a escola ou o do parque  infantil do Souto estean nun nivel de deterioro tan elevado que podan causar problemas ou lesións aos nenos e nenas. De feito o Grupo municipal do BNG rexistrou un escrito pedindo que se tomasen medidas co parque do Souto. A resposta do alcalde  non se fixo esperar indicando que o parque se atopa nun plan da deputación para arranxar. Esta resposta é insuficiente xa que o goberno ten que actuar e tomar medidas incluso de precintado do parque se é perigoso como parece.

 

Corte de luz no local social, a AVV de Sillobre conta cun local social  de titularidade municipal que sufriu dous cortes de luz por problemas entre o concello de Fene e a empresa subministradora.  Nos últimos días a AVV tivo que suspender actividades por falta de luz.

 

Protesta da ANPA do colexio de SIllobre, os pais e nais entregaron un escrito coas deficiencias do parque infantil e o patio da escola. Esta xa é unha demanda de vello, incluso chegaron a facer un arranxo e pintado os propios pais e nais.

 

O BNG a través dos seus concelleiros preguntaran e demandaran que se atendan estas necesidades coa máxima dilixencia. 

 

 

 

 

Tempo de Entroido

Nestas datas de Entroido o BNG de Fene súmase cunha canción reivindicativa sobre a situación do noso sector naval dende hai case 30 anos.

 

 

A quén lle importa?

 

Hai case 30 anos

mandáronnos á porra

e o primeiro culpable

no Gas, feliz se forra.

Que máis lle deu

tamén ao do bigote?

de ENDESA chupa ben do bote.

 

A Xunta non fai nada e

na capital do “Reino”

non falan con Bruxelas

pra levantar o veto,

que mais lles dá?

rínsenos no careto!

e veña sobres para o peto!

 

En Madrid dálles igual,

Europa... a vetar,

e aquí Feijoo a trolear...

 

A quén lle importa que aquí se emigre,

A quén lle importa que isto se afunda?

Feijoo e Rajoy veña a prometer

o que non van facer

(bis)

 

Prométennos un dique

despois danlle mil voltas

para acabar dicindo

que a culpa é de Europa

PP e PSOE

 pásanse a pelota

Viva o Entroido e a chirigota!

 

A Europa dálle igual,

Madrid faino fatal,

e aquí Feijoo a trolear...

 

A quén lle importa que aquí se emigre,

A quén lle importa que isto se afunda?

Feijoo e Rajoy veña a prometer

o que non van facer

(bis)



O BNG DE FENE PIDE A COMPARECECENCIA DA PORTAVOZ DO PP NO PLENO ANTE A FALLA DE RESPOSTAS ÁS IRREGULARIDADES EN FACTURAS DO ANO 2012

Os nacionalistas de Fene presentaremos unha moción de urxencia ao Pleno ordinario de mañá xoves, na que se solicitará a comparecencia da portavoz popular, Rocío Bértoa, que tamén ostenta as delegacións de cultura, deportes e urbanismo.

A iniciativa de control do BNG á xestión da concelleira derívase da ocultación que fai o PP de pagos irregulares a  varias empresas. Existen duplicidades nos gastos realizados e contratacións verbais. No caso de Eulen, logo dun proceso de contratación no que só se presentou esta empresa dirixida pola irmá de Feijoo, desde o BNG denunciamos a súa neglixencia na limpeza da piscina no mes de xuño de 2012. Logo vimos que polo prezo de adxudicación era imposíbel que se realizasen os traballos, e agora atopámonos cunha facturación inflada que supera amplamente as condicións contratadas.

 

Os nacionalistas revisamos parte das facturas pagadas no exercicio 2012 e pedimos explicacións concretas por escrito o pasado 21 de decembro, e verbalmente no Pleno do 10 de xaneiro. O alcalde non deu explicación algunha. Agora tócalle responder ante o Pleno, xa que nas xuntas de goberno teñen aprobadas estas facturas con informes desfavorables.

 

No BNG queremos un Concello transparente nas contratacións de empresas e persoas, no que se dean respostas. Por isto pediremos a toda a Corporación apoio á nosa petición de comparecencia da portavoz popular ante o máximo órgano de representación democrática.

 

 

Grupo Municipal do BNG de Fene